Жандос Берікқанұлы Лепсі ауылдық округіне қарасты Көкжиде ауылында дүниеге келген. 2016 жылы Ерікті орта мектебін тамамдаған. Отбасындағы төрт баланың үлкені. Үш қарындасына сүйеу. Әкесі Берікхан Мағзұмов ұзақ жыл ветеринар болып еңбек етсе, анасы Динара Дүйсембекова балабақшада тәрбиеші. Жандостың мамандық таңдауына отбасындағы адал еңбекке деген құрмет әсер еткен. Еңбекке жауапкершілікпен қарау, бастаған істі соңына дейін жеткізу, адамдарға пайдасын тигізу Жандостың бойына отбасындағы тәрбиеден сіңген.
– Бала кезімнен сурет салғанды, бір нәрсенің сызбасын жасағанды ұнататынмын. Құрылыс саласы қызығушылығымның бәріне жол ашатынын түсіндім. Мұнда есеп, дәлдік, логика да рөл ойнайды, – дейді ол.
Жас маман Алматыдағы Қазақ бас сәулет-құрылыс академиясына түсіп, «Құрылыс» мамандығы бойынша жоғары білім алып шықты. Алайда оның кәсіби жолы диплом алғаннан кейін емес, студент кезінен басталған. 2019 жылы «Construction» акционерлік қоғамына инженер-құрылысшы болып жұмысқа орналасып, өндірістің қыр-сырын іс жүзінде меңгере бастады. Арматура орнату, монолитті жұмыстар, қалып құрастыру, құрылыс материалдарын қабылдау, атқарылған жұмыстардың талапқа сәйкестігін тексеру жас маманның тәжірибесін ұштады. Жұмыс барысын назарда ұстап, материалдың сапасын қадағалап, жобалық құжаттаманы мұқият оқу қателесудің алдын алады: Жандос осы талаптардың бәрін тәжірибе арқылы меңгерді. Кейін төрт жылдан астам уақыт «Sunkar» ЖШС-де еңбек етті. Одан соң «Etasa» компаниясында прораб қызметін атқарды. Осылайша ол қарапайым инженерден тәжірибелі маманға, одан бөлімше басшысына дейінгі жолды біртіндеп жүріп өтті. Қазір оның құрылыс саласындағы еңбек өтілі жеті жылдан асты. Өткен жылдың ақпан айынан бастап «Нұр-Шапағат Құрылыс» компаниясының ұйымдастыру мен бақылау жұмысына жауап береді. Бүгінде ол туған ауылы Лепсідегі аурухананың күрделі жөндеу жұмысын жүргізуде. Бұл медициналық мекеме тек Лепсі тұрғындарына ғана емес, Көкжиде, Көктөбек, Мұқан Төлебаев ауылының және маңайдағы теміржол разъездерінің тұрғындарына да қызмет көрсетеді. Сондықтан аурухананың жаңаруы – ауыл халқы үшін аса маңызды. Мұндай нысанда жұмыс істеу бөлімше басшысына үлкен міндет жүктейді. Құрылыс жұмыстарының жобаға және белгіленген талаптарға сәйкестігін қадағалау, нысанды мерзімнен кешіктірмей қолданысқа беру назарынан тыс қалмауы тиіс. Жандос үшін бұл нысанның тағы бір ерекшелігі бар. Ол мұнда өз ауылдастарының игілігіне жұмыс істеп жүр. Ауруханадан ем алатын адамдардың арасында туыстары, таныстары, ұстаздары бар.
– Өз ауылыңда жерлестерің үшін жұмыс істегенде жауапкершілік ерекше сезіледі. Барлығы сапалы әрі берік болғанын қалайсың. Өйткені бұл аурухана халыққа бір-екі жыл емес, ұзақ уақыт қызмет етуі керек, – дейді Жандос.
Бүгінгі құрылысшының жұмысы бұрынғыдай тек қол еңбегімен шектелмейді. Қазір маман арнайы бағдарламалармен жұмыс істей білуі керек. Жандос та күнделікті қызметінде «AutoCAD», «MS Project» секілді бағдарламаларды меңгерді. Есеп-қисап жүргізу, жұмыс кестесін жасау, құрылыс барысын жоспарлау – оның күнделікті міндетінің бірі. Жас маман өзінің бойындағы басты қасиет – жауапкершілік, ұқыптылық, уақытты бағалау, ұсақ-түйекке дейін мән беру және үнемі іздену екенін айтады.
Кеше ғана студент болған жас жігіт алдымен қарапайым жұмыстарды меңгерді. Тәжірибе жинады. Қателіктерден сабақ алды. Өздігінен шешім қабылдауды үйренді. Уақыт өте келе өзгелердің жұмысын ұйымдастыратын деңгейге көтерілді. Құрылысшының еңбегі осындай. Бір қарағанда, оның жұмысы – кірпіш қалау, қабырға тұрғызу, терезе орнату секілді көрінуі мүмкін. Ал шын мәнінде құрылысшы елдің ертеңіне қызмет ететін нысандарды дүниеге әкеледі. Мектеп, аурухана, тұрғын үй, жол – барлығы да маңдайдан сорғалап аққан термен тұрғызылады. Әсіресе ауылдық жерлерде жас мамандардың еңбек етуі үлкен мәнге ие. Туған жерден түлеп ұшып, білім алып, тәжірибе жинап, қайтадан елге қызмет ету – кейінгі жастарға үлгі. Алдында әлі талай құрылыс нысаны, күрделі жоба, жаңа міндеттер күтіп тұр. Бірақ оның кәсіби іргетасы қазірдің өзінде қаланды. Оның негізі – сапалы білім, жеті жылдан астам еңбек тәжірибесі, маңдай тер және әр істің нәтижесіне жауап бере білу арқылы қаланды.
Жандос Тұрсынханның сызба сызудан басталған бала күнгі қызығушылығы туған жеріндегі маңызды нысанның жаңаруына үлес қосуға ұласты. Жандосқа және оның әріптестеріне еңбектеріне береке, қолға алған жұмыстарына сапа, жаңа жобаларына сәттілік тілейміз. Елге қажет нысандарды тұрғызып, туған жерінің өркендеуіне үлес қосатын жас мамандар көбейе берсін.
Гүлжан ТҰРСЫН
