Қырғызстанда ұлттық спорт әуесқойларын бір арнаға тоғыстырған VI Дүниежүзілік көшпенділер ойындары салтанатты түрде жалауын көтерді, – деп хабарлайды 7-su.kz ақпараттық порталы.
Мемлекет басшысы Қасым-Жомарт Тоқаев «Бішкек Арена» стадионында өткен айтулы шараның ашылу салтанатын арнайы барып тамашалады. Мәртебелі мейманды Қырғыз Республикасының Президенті Садыр Жапаров зор құрметпен күтіп алды.
Бұл жолғы айтулы спорт додасы 31 тамыз бен 6 қыркүйек аралығында көршілес елдің Ыстықкөл облысында ұйымдастырылуда. Жаһандық деңгейдегі жарыста 100-ден астам мемлекеттен келген 3 мыңға жуық спортшы өзара мықтыны анықтайды. Бәсекеде спорттың 43 түрінен жүлделер сарапқа салынады. Бағдарламаға қазақ халқының төл өнері мен ұлттық спорт түрлері де енген.
Қазақстан құрамасы атынан 150-ден астам спортшы сынға түседі. Отандастарымыз сайыстың барлық 43 түрі бойынша бақ сынап, ел намысын қорғауға сақадай сай.
Дүниежүзілік көшпенділер ойындары – тек спорттық жарыс емес, бұл Орталық Азия елдерінің мәдени байланысын нығайтып, тарихи тамырластықты жаңғыртатын бірегей алаң. Ұлттық ойындарды халықаралық деңгейде насихаттау өңірдегі туризмді дамытуға, этноөнерді дәріптеуге зор серпін береді.
Бұл бастама жастар арасында салауатты өмір салтын қалыптастырып, ата-бабадан қалған асыл мұраны ұлықтауға бағытталған. Шетелдік меймандар мен спортшылардың басын қосатын бұралаңсыз сұхбат алаңы халықтар арасындағы достық пен өзара түсіністікті арттырады. Осындай ірі халықаралық жобалар өңірлік ынтымақтастықты дамытудың пәрменді құралы болып келеді.
Ұлттық құрамамыздың дайындығы жоғары, спортшыларымыздың жүлделі орындардан көрінуге мүмкіндігі мол. Мұндай ірі турнирлер ұлттық брендтерді қалыптастыруға әрі Қазақстанның спорттық беделін биікке көтеруге жол ашады.
