Ескелді ауданына қарасты Қарабұлақ ауылындағы орталық базар аумағында ауыл шаруашылығы өнімдерінің жәрмеңкесі өтіп, жергілікті тұрғындар мен фермерлер өзара тікелей байланыс орнатты, – деп хабарлайды 7-su.kz ақпараттық порталы.
Маңызды саяси науқан күні ұйымдастырылған ауқымды шара барысында сауда сөрелеріне аймақ шаруалары өндірген табиғи таза көкөніс, жеміс-жидек, ет пен сүт өнімдері шығарылды. Тұрғындар нарық бағасынан айтарлықтай төмен құнмен сатылған тауарларды сатып алып, өз таңдауларын жасау мүмкіндігіне ие болды. Аграрлық секторды дамыту, халықтың әл-ауқатын жақсарту және отандық өндірушілерді жан-жақты қолдау мәселелері қоғам назарында тұр.
Жәрмеңкеге қатысушылар мен жергілікті фермерлер өз кезегінде атқарылып жатқан жұмыстарға қатысты оң пікірлерін білдірді. Шаруалар қауымы өз өнімдерін тікелей халыққа ұсыну арқылы тұтынушылардың сеніміне ие болатынын атап өтті.
– Бүгінгі жәрмеңке фермерлеріміз мен ауыл тұрғындарының қаншама еңбек сіңіріп жатқанын айқын көрсетеді. Өнімді өз жерімізде өндіреміз және ауыл шаруашылығының қарқынды дамығанын қалаймыз, – дейді қатысушылардың бірі.
Өз кезегінде сауда жасауға келген жұртшылық та мұндай бастамалардың әлеуметтік маңызы зор екенін жеткізді. Тұрғындар жергілікті өнімдерді сатып алу арқылы туған өңірдің экономикасына үлес қосатынын айрықша атап өтті.
– Жергілікті өнімдерді қолжетімді бағамен сатып алып қана қоймай, маңызды саяси науқанға қатысып жатырмыз. Инфрақұрылымды дамыту, жаңа жұмыс орындарын ашу және жастарға қолайлы жағдай жасау басты мақсат болуы тиіс, – деді Қарабұлақ ауылының тұрғыны.
