Қазақстанда атом электр станциясын салу үшін Ресейден мемлекетаралық несие тарту жоспарланып отыр. Бұл туралы Атом энергиясы жөніндегі агенттік төрағасы Алмасадам Сәтқалиев мәлімдеді, – деп хабарлайды 7-su.kz ақпараттық порталы.
Оның айтуынша, АЭС құрылысына қаржы тарту мәселесінде қиындық күтілмейді. Қазіргі таңда Қазақстан мен Ресей мемлекетаралық несие беру тетіктерін әзірлеп жатыр.
«Бірінші келісім атом электр станциясының құрылысына қатысты болса, екіншісі Ресей тарапынан қаржыландыру шарттарын қамтиды. Жоба құнының 85 пайызы несие есебінен, ал 15 пайызы Қазақстан Үкіметі тарапынан қаржыландырылады», – деді Алмасадам Сәтқалиев.
Жобаның нақты құны жобалау кезеңі аяқталғаннан кейін белгілі болады. Алдын ала есептеулерге сәйкес, әрқайсының қуаты 1200 мегаватт болатын екі энергия блогының құрылысына шамамен 15 миллиард доллар қажет болуы мүмкін.
Бұған дейін Қазақстанда атом электр станциясын салу ықтимал тағы бір өңір аталған болатын.
