Елімізде экосаясатты жаңғырту және жасыл экономиканы өркендету бағытында маңызды қадам жасалып, Астана қаласында Париж келісімі аясында көміртегі жобаларын іске асыруға арналған ауқымды екі күндік жиын басталды, – деп хабарлайды 7-su.kz ақпараттық порталы.
Халықаралық сарапшылар, мемлекеттік органдар мен қаржы институттарының өкілдері бас қосқан бұл шарада қоршаған ортаны қорғау және парниктік газдарды азайту мәселелері талқылануда. Министрлік пен БҰҰ Даму бағдарламасының ұйытқы болуымен өтіп жатқан жиында мемлекеттің экологиялық бастамаларды қолдауға дайын екені айқын көрініс тапты. Қазіргі таңда мемлекеттік деңгейде қабылданған жаңа ережелер шетелдік инвестицияларды тартып қана қоймай, ірі өнеркәсіп орындары мен кәсіпорындардың экологиялық жауапкершілігін күшейтуге жол ашады.
Экология және табиғи ресурстар министрлігінің баспасөз қызметі жиын барысында қатысушыларға жаңа нормативтік талаптар түсіндіріліп, халықаралық көміртегі нарығына шығу тетіктері жан-жақты талқылағанын хабарлады. Экология министрі Е.Нысанбаевтың айтуынша, Париж келісімінің нарықтық тетіктеріне белсенді түрде қатысу ел экономикасын жасыл бағытта дамытуға тың серпін береді. Ормандарды қалпына келтіру, көміртекті сіңіру көрсеткіштерін арттыру және табиғи шешімдерді жүзеге асыру арқылы республикамыз жаһандық климаттық мақсаттарға өз үлесін қосып келеді. Мамандардың пікірінше, орман өсіру және көгалдандыру бағытындағы жобалардың тиімділігі Астананың жасыл белдеуін аралау барысында нақты мысалдармен көрсетілді. Мұндай бастамалар қалалық ортаның экосистемасын жақсартып, ауа сапасын арттыруға зор әсер етеді.
Еліміздің Экологиялық кодексіне енгізілген түзетулер халықаралық стандарттарға сай жұмыс істеуге мүмкіндік береді. Жаңа ережелер ұлттық мүддені қорғай отырып, климаттық қаржыландыруды тиімді игеруге жағдай жасайды. Тұрақты даму мен табиғатты қорғау бағытындағы осындай игі істер халықтың экологиялық сауаттылығын көтеріп, жас ұрпақтың табиғатқа деген жанашырлық сезімін ояртады.
