Қазақстанда жеңіл көліктің бағасы бір жыл ішінде 11,6 пайызға өсіп, Еуразиялық экономикалық одақ (ЕАЭО) елдері арасындағы ең жоғары көрсеткішке жетті. Бұл туралы Data Hub сараптамалық платформасы хабарлады.
Салыстыру үшін, ЕАЭО елдерінде автокөлік бағасының орташа өсімі небәрі 2,2 пайызды құрады. Тіпті кейбір елдерде көлік арзандаған. Атап айтқанда, Армения мен Беларусьта жеңіл көліктер бағасы төмендесе, Қырғызстанда 0,2 пайызға, Ресейде 1,4 пайызға ғана қымбаттаған.
2025 жылдың бірінші жартыжылдығы қорытындысы бойынша, ЕАЭО елдерінің ішінде тек Қазақстан мен Ресейде көлік бағасы өскені байқалды: Қазақстанда — 9,3 пайызға, Ресейде — 2,8 пайызға.
Қазақстан Ұлттық статистика бюросының мәліметінше, елдегі көлік бағасының шарықтауына ең алдымен жаңа көліктердің қымбаттауы себеп болған. Маусым айының қорытындысы бойынша, жаңа көліктердің бағасы өткен жылдың сәйкес кезеңімен салыстырғанда 21,3 пайызға өскен. Ал ескі көліктердің бағасы керісінше, сәл арзандаған.
2025 жылғы 1 маусымдағы жағдай бойынша, елімізде тіркелген көлік құралдарының саны 6,3 миллионға жеткен. Бұл көрсеткіш көлікке деген сұраныстың әлі де жоғары екенін көрсетеді.
Мамандар бағаның күрт өсуін ішкі нарықтағы сұраныстың артуымен, валюта бағамдарының өзгеруімен және сыртқы жеткізу тізбектеріндегі қиындықтармен байланыстырады.
