Қазақстан Үкіметі туризм саласындағы жаңа басым бағыт ретінде тау туризмін таңдады. Туризм және спорт министрі Ербол Мырзабосыновтың айтуынша, бұл шешім халықаралық тәжірибеге және саланың экономикалық әлеуетіне негізделген, деп хабарлайды 7-su.kz желілік басылымы.
Министрдің мәліметінше, тауға келетін турист бір сапарында орта есеппен 350 АҚШ долларын жұмсайды. Бұл жағажай демалушыларымен салыстырғанда жеті есе көп – жағажай туризмінде орташа шығын 50 долларды құрайды.
Осыған байланысты мемлекет басшысының тапсырмасына сәйкес Алматы тау кластерін дамыту бойынша кешенді жоспар әзірленді. Жобаның басты мақсаты – еліміздің тау туризмі әлеуетін толық іске асыру.
Тау туризміне инвестициялық қызығушылық артып келе жатқан өңірлердің қатарында Шығыс Қазақстан облысы ерекше атап өтілді. Қазіргі уақытта Катонқарағай мен Зайсан өңірлерінде әуежайлардың құрылысы жүріп жатыр. Бұл инфрақұрылымдық жобалар болашақта туристер ағынын еселеп арттыруға мүмкіндік береді.
Министрлік Шығыс Қазақстан облысы әкімдігімен бірлесіп, тау туризмін жүйелі түрде дамытуға кіріскен. Бұл бастама ішкі және шетелдік туристерді тартуға ғана емес, сондай-ақ аймақтың әлеуметтік-экономикалық дамуына да оң әсер етпек.
Фото: pixabay.com
