Ескелді ауданында маңызды саяси науқан қарқынды жалғасуда, – деп хабарлайды 7-su.kz ақпараттық порталы.
№125 сайлау учаскесіне келіп, өз азаматтық ұстанымын көрсеткендердің қатарында блогер Ринат Хамзин де бар.
Қоғамдық-медиалық сала өкілдері үшін сайлауға қатысудың мәні зор. Аудиториямен тығыз байланыс орнатып, ауданның тыныс-тіршілігін тұрақты түрде ақпараттандырып жүрген тұлғалар өнеге көрсету арқылы жауапкершіліктің маңызын ұғындырады.
– Меніңше, сайлау – әр азаматтың өз көзқарасын білдіріп, елдің болашағына ықпал етуіне мүмкіндік беретін кезең. Бүгін біз өкілдерді таңдап жатырмыз. Олардың қоғамдық маңызы бар түйткілдер мен тұрғындардың мүдделеріне қатысты салмақты қадамдар жасайтынын түсіну абзал, – дейді Ринат Хамзин.
Оның пайымынша, халықтың оқиғаларға бейжай қарамай, сайланған тұлғалардың қызметіне қызығушылық танытуы өте маңызды. Блогер ретінде аудиторияға маңызды жайттарды жеткізіп қана қоймай, жеке үлгі көрсетуді жөн санаған.
– Өңір тұрғындары үшін ауылдық аумақтарды өркендету, инфрақұрылымды жақсарту, жастарды қолдау мен еңбек етуге жағдай жасау – басты бағыттар. Осы бағыттағы жұмыстар депутаттардың назарында болуы тиіс, – деді ол.
Жастарды қоғамдық өмірден шет қалмауға үндеген ол белсенділік әркімнің өз қадамынан басталатынын атап өтті. Мемлекет ұсынатын мүмкіндіктерді тиімді пайдаланып қана қоймай, ортақ іске үлес қосу – әр отандастың борышы.
