Алдағы өтетін Қазақстан Республикасы Парламент Мәжілісі депутаттарын сайлауға облыстық Қазақстан халқы Ассамблеясы атынан ұсынылған үміткердің аты-жөні белгілі болды. Бұл туралы облыстық Қазақстан халқы Ассамблеясы кеңесінің онлайн режимде өткен кезектен тыс отырысында облыс әкімі Амандық БАТАЛОВ мәлімдеді.
Кеңес отырысында Амандық Ғаббасұлы сөз кезегін облыстық Қазақстан халқы Ассамблеясы жанындағы қоғамдық келісім кеңесінің төрағасы Оралбек Жақиянов пен облыстық Ассамблея мүшесі Наталья Хоменкоға және облыстық корей этномәдени орталығының төрағасы Владимир Лиге беріп, ұсыныстарды тыңдады. Олар облыстық Қазақстан халқы Ассамблеясының атынан ҚР Парламент Мәжілісінің депутаттығына ұсынылып отырған Владимир Тохтасуновтың өмірбаяны мен еңбек жолына қатысты ойлары мен пікірлерін ортаға салып, үміткердің сенім үдесінен шығарына сенетіндіктерін жеткізді.
Осылайша облыстық Қазақстан халқы Ассамблеясы кеңесінің 28 мүшесі дауыс беріп, үміткердің кандидатурасын қолдайтындықтарын білдірді. Ашық дауыс беріп, қол көтергендердің көпшілігі жиынға қашықтан қатысып, алқалы жиынды онлайн тамашалады. Кезектен тыс кеңес отырысын қорытындылаған облыстық Қазақстан халқы Ассамблеясының төрағасы, облыс әкімі Амандық Баталов Владимир Тохтасуновты өз ісін жетік білетін маман ретінде ертеден білетінін жеткізіп, ҚР Парламент Мәжілісінің депутаты ретінде өңірдің өркендеуіне лайықты үлес қосады деп сенетінін атап өтті. Владимир Имтахунович Тохтасунов өзіне қолдау білдірген көпшілікке ризашылығын білдіріп, жауапкершілік жүгін ақтайтынын жеткізді.
Мәди АЛЖАНБАЙ
Алматы облысы
Сурет ғаламтордан алынды
