Сарқандық шаруалар қант қызылшасын жинауды аяқтауға таяды.
Биыл Сарқан қаласы бойынша 147 шаруа қожалығы егін шаруашылығымен айналысты. Соның ішінде 8 шаруа қожалығы қант қызылшасын өсіруге ден қойып, жалпы 585 гектар жерге тәтті түбір дақылын екті. Бүгінде шаруалар өнімнің жартысынан астамын «Ақсу қант» зауытына өткізді. Зауыттың мәліметінше, осы күнге дейін Сарқан қаласы бойынша 9315 тоннаға жуық қант қызылшасы қабылданған. Жалпы биылғы ауа райы мен топырақ жағдайы қант қызылшасының жақсы өнім беруіне оң әсерін тигізді.
Шаруалар өз еңбектерінің жемісін көріп, маусымдық жұмыстарды аяқтап қалды. Өнімді тасымалдау жұмыстарына 38 жүк көлігі тартылып, тәулік бойы іс атқаруда. Шаруалардың айтуынша, күз айларында ауа райы егін жинауға қолайлы болғанымен қараша айының басынан бастап күн суыта бастады. Осыған байланысты шаруалар бағалы дақылды қар түспей жинап алу үшін тынымсыз еңбек етуде. Қазіргі таңда қала аумағында қазылмаған балтамырдың көлемі – 60 гектар.
Қалған шаруалар өнімдерін толық қазып, бурттарға (сақтау орындарына) жинап қойды. Қала аумағындағы шаруалар күздік бидай себуді толық аяқтады. Қала әкімдігінің бас маманы Тілеужан Әскербектің сөзінше, биыл 22 шаруа қожалығы жалпы 1194 гектар егістікке күздік бидай еккен. Ауыл шаруашылығы мамандарының айтуынша, «Стекловидный» сорты Сарқан өңірінің табиғи жағдайына бейім, өнімділігі жоғары болғандықтан шаруалар дәл осы сортты таңдаған. Қант қызылшасын жинау мен күздік бидай себу науқандарының сәтті аяқталуы – диқандардың еңбексүйгіштігі мен табиғатқа бейімделе еңбек етуінің айқын көрінісі.
Жақсылық ЖОМАРТҰЛЫ
Сарқан ауданы
