Жетісу облысы бойынша статистика департаменті – елімізде жаңадан құрылған құрылымдардың бірі. 2022 жылдың 8 маусымында құрылған департамент 8 аудан мен 2 қаланы қамтиды.
Бүгінде өңір халқының саны 691 814 адам. Құрылғанына 3 жыл ғана болса да департамент ел дамуына қатысты негізгі көрсеткіштерді уақтылы әрі сапалы ұсынуда. Әрбір қызметкер осы маңызды істің сапалы жүзеге асуына өз үлесін қосып келеді.
Биыл Қазақстанда Мемлекеттік статистиканың құрылғанына 105 жыл толып отыр. Бұл жүйе 1920 жылы 8 қарашада Қазақ КСР-інде ресми түрде құрылған. Кейін бұл күн Мемлекет басшысының Жарлығымен Статистика күні болып бекітілді.
Статистика органдары ел дамуының нақты көрінісін көрсететін сенімді дереккөзіне айналды. Соңғы жылдары салада бірқатар маңызды реформа жүзеге асты. Президент Қасым-Жомарт Тоқаев 2020 жылғы Жолдауында Стратегиялық жоспарлау және реформалар агенттігін құрып, Статистика бюросын осы агенттікке қосты. Бұл шешім саланың дербестігін нығайтып, оның рөлі мен жауапкершілігін арттырды.
Қазіргі таңда Қазақстанда статистика халықаралық стандарттар мен заманауи әдіснамаларға толық сәйкес жүргізіледі. Онлайн есеп тапсыру жолға қойылып, балама дереккөздер енгізіліп, халық үшін ақпараттың қолжетімділігі артты. ЭЫДҰ Қазақстанның статистикалық тәжірибесін жоғары бағалап, елдің аталмыш ұйымның ұсыныстарына қосылғанын растады. Бұл – ТМД кеңістігі үшін үлкен жетістік.
2021 жылы алғаш рет сандық форматта өткен Ұлттық халық санағы, ал биыл 1 тамыздан басталған ауыл шаруашылығы санағы – статистика саласындағы маңызды оқиғалар болмақ. Ауыл шаруашылығы санағы агросалаға нақты қолдау шараларын әзірлеуге, ауылдағы инфрақұрылымды дамытуға негіз болады.
Мемлекеттік статистиканың 105 жылдығы аясында Жетісу облыстық департаментінде бірқатар іс-шара жоспарланып, жүзеге асырылуда.
ҚР СЖРА Ұлттық статистика бюросының
Жетісу облысы бойынша департаменті
