Отбасы – сыйластық, жарастық орнаған орта. «Отан – отбасынан басталады» дегендей, Отанды сүю отбасынан бастау алатыны рас.
Отбасы – бала тәрбиесінің ен алғашкы ұжымы. Адамның жеке қалыптасуы осы кішкентай ғана Отаннан басталады. Оның ержетіп өсуі, бойындағы алғашкы адамгершілік белгілері отбасында қалыптасады. Сондықтан да туған үйдің жылуы – әркімнің көкірегінде көп жыл бойы сақталып, мәңгі есінде жүреді.
Осы орайда Халықаралық отбасы күнінде «отбасы» деген ұғымды ардақтап, оның терең мән-мағынасына үңіле білген жас ана, ақын, журналист Лида Жанботақызының отбасын айтып өтпеске болмады.
Лиданың Қаратал аудандық «Қаратал» газетінде тілші болып жүргеніне 9 жыл. Ал өмірлік серігі Жәнібек Захан Бастөбе ауылдық округіне қарасты Ортатөбе ауылының фельдшер-мал дәрігері қызметін атқарады. Биыл тамызда Жәнібек пен Лиданың отау кұрғанына 18 жыл толады. Бүгінде 4 ұл, 4 қыз өсіріп отырған ардақты әке мен аяулы ана балаларының болашағы үшін еңбектеніп, заман көшіне ілесіп, қоңыр тіршілік кешуде.
– «Тәрбие талбесіктен» дегендей, өмірге сәби әкелген соң баланың тәрбиелі, салиқалы болып өсуіне тікелей жауапты ата-ана. Сол себепті де балаларды барынша үлгілі, енбекқор етіп тәрбиелеудеміз. «Балаңды тәрбиелеймін десең, алдымен өзіңді тәрбиеле», дейді. Бала айтқаныңды емес, сенен көргенін істейді. Сондықтан ұл-қыздарымызға үлгі болу жолында барымызды салып тырысамыз. Казіргідей мейірім азайған коғамда балаларымыз мейірімге шөлдеп қалмауы үшін сабырлы болуға, себепсіз жақсы көруге, жақсы сөз көп айтуға көңіл бөлеміз. Қарапайымдылықты туғаннан бойларына сіңірдік. Отбасында қайырымдылық істі көп дәріптейміз. Соның нәтижесі болар, үлкен балаларым: «Анашым, біз өскенде киналған кісілерге көмектесеміз, үйі жоқтарға үй алып береміз, балаларын мектепке дайындаймыз» деп жиі айтып отырады. Соған қарап риза боламыз, іштей қуанамыз. Ата-ана үшін баласының саналы болғаны үлкен бақыт емес пе?! – дейді көпбалалы ана Лида Жанботақызы.
Расында тіршілік қамымен сырттан қанша шаршап келсең де балаларға жылы қабақ танытып, мейірлене көңіл бөлінсе, әкесі анасын еркелетсе, анасы ошағын жайнатып, қазанын қайнатып, жылы кабағымен, ыстық құшағымен қарсы алса оны көрген ұл мен қыздың ертеңі де тамаша болары сөзсіз. Ата-ана ретінде балаға негізгі құндылық бастың амандығы, деннің саулығы татулық-бірлікте, білімділік пен енбекқорлықта екенін түсіндіруіміз керек.
Отбасының жемісі — тәрбиелі ұлы мен қызы дейтіндей мақтан етер ұрпағымыз көбейсін. Ұрпағына сүйінішпен қарайтын қазыналы қарттарымыз көп болғай. Қазақтың әр отбасының керегесі кең, шаңырағы берік әрі биік болуына тілекшіміз!
Айғаным АЙТМҰХАН
