ҚР ҰҚК шегара қызметі Жетісу облысы бойынша департаментіне қарасты «Қорғас» шегаралық басқармасында «оқу орталығы» ашылды.
Салтанатты шарада полковник Алексей Якуба:
– Бүгін «Қорғас» шегаралық бақылау басқармасының тарихында айрықша күн. Басқарманың тарихында алғашқы рет ашылғалы отырған орталық шегарашылардың білімін шыңдайтын, қызмет сапасын арттыратын ерекше орынға айналары сөзсіз. Құрметті шегарашылар, сіздер еліміздің қырағы сақшысысыздар. Сіздердің кәсіби шеберліктеріңіз бен жауапкершіліктеріңіз – мемлекеттің қауіпсіздігіне тікелей әсер етеді. Осы орталықта алған білімдеріңіз сіздерді өз ісінің нағыз маманы етуге көмектесетіні белгілі. Баршаңызды осы тарихи күнмен құттықтаймын! – деді.
Осыдан кейін подполковник Глеб Рыбалкин жаңа оқу орталығының әскери қызметшілер үшін маңыздылығын айтып, болашақта білікті мамандардың ұстаханасына айналарына сенім білдірді. Өз кезегінде шегарашы ардагер толыстағы прапорщик Почунай Зульрова: «Бақылаушылар шегара қызметінің бет-бейнесі. Сіздер әрқашан мұқият, жинақы және сыпайы болуларыңыз керек. Бұл орталықта алынған білімдеріңіз сіздерді білікті маман етіп қалыптастыруға үлкен септігін тигізеді», – деп жүрекжарды тілегін жеткізді.
Келесі кезекте қызыл лента қиылып, шараға жиналғандар жаңа оқу орталығына бас сұқты. Келген қонақтар жаңа ғимараттың мүмкіндіктерімен, оқу кабинеттерімен, шеберлікті арттыруға арналған жұмыс орындарымен және шегарашылардың кәсіби дағдыларын дамытуға арналған құрал-жабдықтармен танысты.
«Жетісу-Ақпарат»
