Шерзат Полаттың өліміне байланысты қаралып жатқан қылмыстық іс аясында сотталушылар мемлекеттік айыптаушыны істен шеттетуді талап етті.
Бұл туралы 7-su.kz ақпараттық порталы хабарлайды.
Сот отырысы барысында айыпталушылардың адвокаттары бірауыздан прокурор Дана Сәрсенбайдың әрекетіне наразылық білдірді. Олардың айтуынша, мемлекеттік айыптаушы сот процесінде бейтараптылық танытпай, айыпталушыны шатастырып, қысым көрсетіп отыр.
– Прокурор эмоцияға беріліп жатыр. Бұған дейін оған ескерту де жасалған. Ол «жәбірленушілермен бір жақпыз» деп айтты. Алайда айыптаушы екі тарапқа да бейтарап болуы тиіс, – деді айыпталушының қорғаушысы.
Адвокаттар сондай-ақ прокурордың істі жан-жақты зерттемегенін, кәсіби біліктілігі жеткіліксіз екенін алға тартты.
Өз кезегінде Дана Сәрсенбай бұл айыптаулармен келіспейтінін мәлімдеп, адвокаттардың наразылығы оны іс жүргізуден шеттету үшін жеткіліксіз деп есептейтінін айтты.
Жәбірленуші тараптың қорғаушылары да айыптаушыны ауыстырудың қажеті жоқ екенін айтып, Дана Сәрсенбайдың іс жүргізуді жалғастыруын қолдады.
Сот аталған мәселеге қатысты шешім қабылдау үшін кеңесу бөлмесіне кетті.
