Аудандағы жүгері дақылының тұқымы алдымен суарылған жерге себіледі. Өсімдік одан кейінгі өніп, өсу кезеңдерінде де суды көп қажет етеді.
Жүгері орта есеппен жетілгенінше 5-7, ал кейбір құмды, тастақ жерлерде 10 ретке дейін уақытылы суарылып тұруы тиіс. Өңірде өсірілетін басқа да дақылдардың суға деген сұранысы жоғары. Соңғы жылдары құрғақшылық пен су тапшылығынан, шаруашылықтардың көбеюінен су бөлуде күрделі мәселелер туындап, егіншілер қажетті мөлшерде суару жұмысын атқара алмай жүрген. Бұл мәселені аудандағы су шаруашылығы қызметкерлері қожалықтарға берілетін су мен уақытты тиімді пайдаланудың арқасында оң жолға қойды.
Алайда жыл өткен сайын бұрынғы су жолдары тозып, жарамсыздана бастағандықтан проблемалар туындап отыр. Бұған өткен жылғы жаз маусымындағы құрғақшылықтың салдарынан өзендердегі су мөлшерінің төмендеп кетуі де кері әсерін тигізуде. «ҚазСуШар» РМК Панфилов өндірістік учаскесі егін егетін шаруа қожалықтарымен келісімшарт жасасқан. Өңірде жалпы 37 940 гектар суармалы егістік бар, соның 26 мың гектардан астамына жүгері өсіріледі.
Туындаған су тапшылығына байланысты егіншілер алқаптарды тамшылатып және жаңбырлатып суару әдісіне көшуге талпынуда. Алайда жаңа технологияға көшу көп қаражат талап етеді. Сондықтан мамандар егін алқаптарын күзде суаруды қолға алу қажеттігі жөнінде кеңес беруде. Аудан бойынша күзде 27 мың гектардағы жүгері, көпжылдық шөп, басқа да дақылдар алқаптары суарылды.
Мырзағали НҰРСЕЙІТ
Панфилов ауданы
Фото: pricom.kz
