Су тасқыны кезінде Ақтөбе облысында 184 бизнес субъектісіне зақым келсе, оның 50-і қалада. Көбі ауыл шаруашылығы құрылымдары мен қызмет көрсету саласына тиесілі.
Ақтөбеге «Атамекен» ҰКП басқарма төрағасының орынбасары Тимур Нахипбеков пен Ұлттық экономика министрлігінің өкілдері келіп, су тасқыны кезінде зардап шеккен бизнес нысандарының иелерімен кездесті. Ақтөбе облысы бойынша 184 бизнес субъектісінің шығыны шамамен 3,9 млрд теңге. Шығын туралы нақты дерек тек бағалау комиссиясының қорытындысынан соң белгілі болады. Тимур Нахипбеков пен ҚР ҰЭМ кәсіпкерлікті дамыту департаментінің директоры Нұрбол Жаңабековпен бірге Ақтөбе қаласы Алматы ауданындағы шағын және орта кәсіпкерлігін тексеру комиссиясының бағалаушылары және адвокаттармен кездесу өткізді. Кейін су тасқыны кезінде зардап шегіп, тоқтап тұрған нысан иелеріне түсіндіру жұмысын жүргізді. Мәселен демалыс базасының иесі жаңа маусым ашылмай тұрып шығын өтелсе, жұмысын қайта жалғастыруға ниетті.
«Қаңтар оқиғасы кезіндегі ережені негізге алып, шығынды өтеу тетігі дайындалды. Кездесу кезінде ұсыныстар болса қабылдып, талқылауымыз керек. Шығынды өтеу механизмі кезінде бюрократияға жол бермеу жағы қарастырылды. Оны Ұлттық кәсіпкерлер палатасымен бірге әзірледік», — деді ҚР ҰЭМ кәсіпкерлікті дамыту департаментінің директоры Нұрбол Жаңабеков.
Ақтөбе облысы әкімінің орынбасары Ғалымжан Елеуовтің айтуынша, қазір ауыл шаруашылығы құрылымдарының шығынын өтеу үшін бөлек ереже дайындалып жатыр.
Фото: Өңірлік кәсіпкерлер палатасы
