Тауық етін көтерме саудада өткізу нарығына жүргізілген талдау аяқталды.
ҚР Бәсекелестікті қорғау және дамыту агенттігінің Жетісу облысы бойынша департаменті ҚР Бәсекелестікті қорғау және дамыту агенттігінің тапсырмасына сәйкес, құс етін (тауық еті) көтерме саудада өткізу нарығындағы бәсекелестіктің жай-күйіне жоспардан тыс талдау жүргізді. Мұндағы мақсат тауар нарығындағы бәсекелестіктің жай-күйін айқындау, тауар нарығында үстем және монополиялық жағдайға ие нарық субъектілерін анықтау, бәсекелестікті қорғау саласындағы заңнаманы бұзу, оның ішінде үстем немесе монополиялық жағдайды теріс пайдалану белгілерін, басқа да проблемалық мәселелерді анықтау.
Жетісу облысының географиялық шекарасында құс етін (тауық еті) көтерме саудада өткізу нарығы – жоғары шоғырланған нарық ретінде сипатталады. Жетісу өңіріндегі «Көгер ЛТД» ЖШС тауық етін өндірумен айналысатын жалғыз кәсіпорын. Тауық етінің негізгі көлемін елміздің басқа аймақтарынан дилерлік компаниялармен (дистрибьюторлар) жеткізіледі.
Айта кетейік, отандық шаруалар тауық етінің нарықтағы қажеттілігінің 66 пайызын ғана қамтамасыз етсе, қалған 34 пайызы шетелден импортталады. Жүргізілген талдау нәтижелеріне және нарық субъектілері ұсынған мәліметтерге сәйкес монополияға қарсы заңнаманы бұзу белгілері анықталған жоқ.
ҚР Бәсекелестікті қорғау және дамыту агенттігінің
Жетісу облысы бойынша департаменті
Фото: depositphotos.com
