Өткен жылы Талды ауылында «Таусамалы» саябағы ашылған. Елді мекеннің дәл ортасынан орын тепкен ол ерекше әдемі.
Қазір балалар ойнайтын, үлкендер демалатын орынға айналған бұл жер Талды ауылы тұрғындарының үлкен мақтанышы. Саябақтың кіреберісіне темір- бетоннан құйылған биік бағана орнатылып, қазақы ою-өрнекпен көмкерілген қаріптермен «Таусамалы саябағы» деген сөз жазылған. Кешкі уақытта бұл өрнектер электр жарығымен жарқырап, ауылды ажарландырады. Жерге тас плиталар төселіп, орындықтар қойылған. Жол жиектеріне жағалай шамдар орнатылған. Сондай-ақ, субұрқақ, балалар ойнайтын алаңдар мен спорттық орындар, көңілді кештер ұйымдастырылатын сахна жасалған.
– Тау баурайындағы Өсек өзені жағалауына орналасқан бұл ауыл бұрын Лесновка деп аталған. Батыс жағы өзен жағасындағы қалың тоғай, шығысы биік жотамен қымталған ойпаттағы табиғаты тамаша бұл елді мекен сонау ХIХ ғасырдағы орыстардың қоныстануынан бастау алады, – дейді Талды ауылдық округінің әкімі Қуандық Әшіржанов.
Кеңес өкіметі орнағаннан кейін маңайындағы Бұрхан, Қызылеспе, Нағарашы ауылдары тұрғындарының басын қосқан Талды ауылдық кеңесі мен Жамбыл атындағы ұжымдық шаруашылықтың орталығы болды. Өткен ғасырдың екінші жартысында атақты «Қазанның 40 жылдығы» ұжымшарына қосылған соң ел тұрмысы түзеліп, ауыл ажары ашылды. Қазір жазиралы Жаркент өңіріндегі 5 мыңнан аса адам тұратын гүлденген елді мекендердің бірі. Заман талабына сай салынған амбулатория, мектеп, 2 балабақша, Мәдениет үйі мен сауда орындары ауыл тұрғындарының бақуатты өмір сүруіне қызмет етеді.
Жақында мұнда табиғи газ желісі тартылмақ. Аз қамтылған отбасылар мен жас мамандар үшін 16 тұрғын үй мен ауыл балаларына 300 орынды жаңа мектеп салынуда. Алдағы жаңа оқу жылында балаларымыз жаңа білім ошағында оқиды. Болашақта талантты балаларды тәрбиелеу үшін өнер мектебін ашу ойластырылып отыр. Өңірде туу көрсеткіші ілгері. Бұл ауылдастардың дамуын, қарқынды өсімін аңғартады. Азаматтар күшімен жасалған сәнді саябақ ауыл тұрғындарының өркениет өрісіндегі талғам таразысын танытады.
Ауыл әкімінің айтуынша, «Таза Қазақстан» акциясы аясында жаңа жасалған саябаққа 230 саялы буданды арша, ондаған түп қарағай мен шырша көшеттері отырғызылыпты. Өзен жағасындағы ауыл саябағында ағаш көшеттері мен гүлзарларға ылғал беріп тұратын автоматты қондырғылар орнатылған. Саябақты күтіп-баптау мен ондағы электр жарығы үшін ақы төлеуді ауыл азаматтары өз міндетіне алған. Талды ауылы тұрғындарының талғаммен жасалған саябағы өзгеге үлгі. Мұндағы рухани игілікті өз қолдарымен жасаған үлкендердің қам-қарекетіне кішілердің құрметпен қарап, қадірлеуі ұрпақ тәрбиесіне жасалған қайырлы қадамы болмақ.
Мырзағали Нұрсейіт
