Зейнеткерлік жастағы азаматтарға толыққанды және сапалы қызмет көрсету мақсатында Талдықорғанда «Белсенді ұзақ өмір сүру орталығы» ашылды. Осыған орай облыс әкімінің орынбасары Марлен Көлбаев қазыналы қарияларға арналған орталыққа барып, жұмыс барысымен танысты.
Талдықорғанда 2021 жылы зейнеткерлердің денсаулығын жақсарту мақсатында «Белсенді өмір сүру орталығы» ашылған еді. Облыста зейнеткерлер саны көбеюіне байланысты биыл қосымша ашылыпты. Небәрі екі аптада орталыққа 200-ден астам адам келіп, 12 түрлі қызмет алуда. Мұнда қариялар йога, шахмат, вело-тренажер, жүгіру жолдары, үстел теннисі, дойбы, тоғызқұмалақ, тігін машиналары бар, жаттығу залына келіп тегін спортпен шұғылдана алады. Сонымен қатар, медициналық көмек алып, массаж қабылдап, қазақ және ағылшын тілін меңгеруне мүмкіндік бар.
– Болашақ ұрпақтың бейбітшілік заманда шаттықта өмір сүріп жатқандығы қазыналы қарияларымыздың арқасы. Елі үшін барын берген қазыналы қарттарымызды әрқашан да құрметтеп, үлгі-өнегесін жастар арасында ұлықтау біздің басты парызымыз. Облыстағы 88 мың зейнеткердің 25 мыңы Талдықорған қаласының тұрғындары екен. Осыған орай сіздерге аранайы орталық аштық. 16 орынды шағын автобус сатып алдық. Алдағы уақытта біз бассейнге тегін жолдама алып беруді жоспарлап отырмыз. Сондай-ақ, әр сенбі «Жастар» және «Жеңіс» паркіне барып спортпен шұғылдануларыңызға болады, – деді облыс әкімінің орынбасары.
Орталықта 30-ға жуық білікті маман қызмет істейді. Аймақ басшысының орынбасары барлық қызмет түрін аралап, қазыналы қарияларымызбен сөйлесіп, орталық жайлы пікірлері мен ұсыныс-тілектерін тыңдады. Ардагерлер заман талабына сай орталық ашып берген облыс басшысына ризашылығын білдіріп, ақжарма тілегін ақтарды.
– Қаламызда зейнеткерлерге арналған керемет орталық ашылды. Заман талабына сай орталықта тәжірибелі мамандар жұмыс істейді. Ғимараттың іші де кең, таза, жарық. Таңнан кешке дейін орталықта спортпен шұғылданып, демалып, көңіліміз көтеріңкі қайтады. Осындай керемет орталық ашып берген облыс басшылығына алғыс білдіреміз, – дейді Қаламқас Тұрлығұлова.
Ал Ольга Буцик: «Қазақстанның әрбір азаматы қазақ тілін білуі тиіс деп ойлаймын. Осы елде туып, ауасын жұтып, суын ішкен маған қазақ тілін, оның салт-дәстүрін үйрену – азаматтық парызым деп білемін. Сондықтан мен орталыққа келіп қазақ тілін үйреніп жүрмін», – деді.
Айдар ҚАЛИЕВ
Фото: Руслан Қадыров
