Бүгінде Жетісу облысының орталығына қарасты 3-ші бөлімше тұрғын үй алабында көше жолдарын күрделі жөндеу жұмыстары жалғасуда.
Талдықорған қалалық №13 қоғамдық көлік қатынайтын бұл аумақтағы көшелердің ішкі жолдары бұрын сын көтермейтін. Нақтырақ айтқанда көктем-күз айларында су басқан батпақ жол жаяу жүргіншілерді де көлік жүргізушілерінде әбден әуреге салып келген. Жолдың нашарлығынан шаршаған жергілікті жұрт Талдықорған қаласы әкімнің кездесуінде жолды жөндеп беру туралы өз шағымдарын жеткізген. Осыдан көп өтпей тұрғындардың өтінішіне сай аталған мәселені оңтайлы шешу бойынша нақты жоба жасалынып, 3-ші бөлімшенің ішкі көше жолдарын кезең-кезегімен ретке келтіру жұмыстары қолға алынған.
Қалалық жолаушылар көлігі және автомобиль жолдары бөлімінің мәліметінше, 2024-2026 жылдар аралығында 3-ші бөлімшедегі жалпы ұзындығы 15 шақырым болатын 20 көшені жөндеу жоспарланған. Жоба 3 жылға есептелген. Аталған құрылыс жобасын «РСУ 1» ЖШС мердігер ұйымы жүзеге асыруда. Қазір көше жолдарын ретке келтірілу жұмыстары жалғасуда.
– Бұл жоба қаладағы маңызды жол учаскелерін қамтып, жол инфрақұрылымын жақсартып, жүргізушілер мен жаяу жүргіншілер үшін қауіпсіздік пен жайлылықты арттыруда рөлі зор. Жоспар бойынша, өткен жылы аталмыш аумақта 2,6 км болатын 4 көшеге күрделі жөндеу жұмыстары жүргізіліп, асфальт жамылғысы төселген болатын. Ал, биыл яғни 2025 жылы ондағы 7 көшенің 6 шақырымына асфальт жамылғысы төселмек. Келер жылы құрылыстың қалған бөлігі толық аяқталатын болады,– дейді сала жауыптылары.
Еске сала кетсек, қала әкімдігінің дерегінше, өткен жылы облыс орталындағы жол құрылысына 7,7 млрд. теңге бөлінген. Бұл негізінен жолдарды күрделі жөндеу мен күтіп ұстауға бағытталған. Бөлінген қаражаттарға сай шаһардың солтүстік-батысындағы 8, 9 және «Жастар-1» шағын аудандарында 107 көшеге жол салу жоспарланып, бұрын ондағы 10 көше жасалса, 2024 жылы 30 көшеге жаңадан асфальт төселген. Қалған 67 көшенің жөндеу жұмыстар 2026 жылға қарай толық аяқталмақ.
Айдын КӘЛІМХАН
