Талдықорған қалалық жолаушылар көлігі және автомобиль жолдары бөлімінің мәліметінше, биыл Жетісу облысының орталығындағы жолдарға ағымды жөндеу жұмыстары 1 сәуірден басталмақ.
Жауаптылардың сөзінше, қазір ауа температурасының салқындығына байланысты қала аумағындағы қауіпті шұңқырларды уақытша жабу жұмыстары қолға алынған. Ал кешенді жөндеу жұмыстары ауа райы қалыпты болған жағдайда сәуір айынан басталады.
– Биылғы жылы жол жөндеу жұмыстарын өткен жылмен салыстырғанда ертерек бастау жоспарда. Қазірге қала тұрғындарының өтініштерін де назарға алып, көшелердегі жол төсемін қалпына келтіру, шұңқырларды жөндеудеміз. Сондай-ақ, биылғы жылы өткен жылмен салыстырғанда жаңа жол салу, күрделі жөндеу және ағымды жөндеу жұмыстарының көлемі екі есеге арттырдық. Жол саласы бойынша қолға алынған жобалар 2027 жылы аяқталмақ. Сондықтан жөндеу жұмыстары толыққанды басталғанға дейін жұрттың түсіністікпен қарауын сұраймыз»,– дейді қалалық жолаушылар көлігі және автомобиль жолдары бөлімінің басшысы Ерлан Ниетбаев.
Сала мамандарының айтуынша, өткен жылы Талдықорған қаласы бойынша 54 шақырымға жуық жолға жөндеу жұмыстары жүргізілсе, онда негізінен Жастар-1, Солтүстік-Батыс және 8,9 шағын аудандардың көше жолдары қамтылған. Ал жөнделген жолдардың 29 шақырымға жуығы жаңадан салынатын жол болса, 14,6 шақырымы күрделі жөндеуден өткізілуге тиісті жолдар. Биылғы жылы облыс орталығындағы 70 шақырымнан аса жол ретке келтірілмек. Мұнда шаһардағы Құлагер, Бірлік шағын ауданына, Жастар-1 және Солтүстік-Батыс тұрғын үй алабына 53,9 шақырым болатын жаңа жол құрылысы жүргізілмек. Осылайша аймақтағы жаңадан бой түзеп келе жатқан аудандарда 107 көше салынбақ. Сонымен бірге, 21 шақырымнан астам жол күрделі жөндеуден өткізілмек. Бұған қоса, жол жамылғысын ауыстыру бойынша орташа жөндеуге тиіс 27,9 шақырым ұзындықтағы 28 көше жоспарланса, 17450 шаршы метр жолға ағымды жөндеу жұмыстары жүргізілмек.
Айдын КӘЛІМХАН
