Алғыс айту күніне орай Талдықорғанда Қазақстан халқы Ассамблеясы ардагерлері, қоғам белсенділері мен бірлестік өкілдері, жастар және басқа да саланың жетекші мамандарының қатысуымен мерекелік шара өтті.
Алдымен Қаратал ауданы, Бастөбе ауылындағы «Қазақ халқына мың алғыс!» монументіне гүл шоқтары қойылды. Бұл мемориалдық кешенді 2012 жылы корей ұлтының өкілдері орнатқан. Олар 1937 жылы аш-жалаңаш күйде жер аударылып келгенде құшақ жая қарсы алып, қамқоршы болып, барымен бөліскен қазақ халқына деген алғысының айғағы ретінде тұрғызған.
Жиналған қауым алдында сөз алған Жетісу облыстық Ақсақалдар кеңесінің төрағасы Ермек Келемсейіт, корей этномәдени бірлестігінің ақсақалы Пак Виктор және аудан әкімінің өкілі Ұлан Досымбеков бірлік пен келісімнің маңыздылығына кеңінен тоқталып, оның елдің тұрақтылығы мен дамуына қосар үлесі зор екенін айрықша атап өтті.
Осыдан соң мерекелік шара Талдықорғандағы «Достық үйі» ғимаратында жалғасты. Басқосуда Гиннес рекордтар кітабының редакторы Б. Тастүлеков сөз сөйлеп, ізгі тілегін жеткізді. Басқосу соңында өзге этнос өкілдері арасында қазақтың ұлттық тағамдарының бірі – құрт жасаудан арнайы акция ұйымдастырылды. Сайысқа өңірдегі этномәдени бірлестіктер мен еріктілер белсене қатысты. 30 қатысушы 20 минутта 4546 құрт дайындап, КИнЭС рекордтар кітабына енді.
Жауаптылардың сөзінше, бұл жоба қазақтың ұлттық тағам түрін кеңінен дәріптеумен қатар, ортақ іске жұмылған жұртшылықтың бірлігін паш етті.
Мерекелік шара тек Қаратал ауданында мен Талдықорған қаласында ғана емес, облыстағы Панфилов ауданында да қайырымдылық шараларымен жалғасты. Шара соңында Қазақстан халқы Ассамблеясының бірқатар ардагерлері мен белсенді қатысушылары марапатталып, этномәдени бірлестіктердің мүшелері концерттік бағдарлама аясында өнер көрсетті.
Айдын КӘЛІМХАН
