Жетісу облысында түнгі уақытта жол-көлік оқиғасы тіркеліп, салдарынан бір адам қаза тапты, тағы үш адам ауруханаға жеткізілді, деп хабарлайды 7-su.kz ақпараттық порталы.
Облыстық полиция департаментінің мәліметінше, апат Желтоқсан мен Қаблиса Жырау көшелерінің қиылысында болған. Алдын ала деректерге сәйкес, Range Rover маркалы автокөліктің жүргізушісі бағдаршамның тыйым салатын белгісіне қарамастан жолға шығып кетіп, Toyota автокөлігімен соқтығысқан.
Апат салдарынан жолаушылардың бірі оқиға орнында көз жұмды. Тағы екі жолаушы мен жүргізуші түрлі дене жарақатымен ауруханаға жеткізілді.
Полиция департаментінің хабарлауынша, екі көлік те арнайы тұраққа қойылған, қазіргі уақытта тергеу амалдары жүргізілуде. Аталған факті бойынша Қылмыстық кодекстің тиісті бабы бойынша іс қозғалды.
Жол апатына қатысты бейнематериалдар мен фотосуреттер әлеуметтік желілерде тарап жатыр.
