Алдымен қаладағы «Құлагер» шағын ауданындағы жаңа саябаққа ат басын тіреген шаһар басшысының орынбасары ондағы мердігер мекеменің жауаптыларына құрылыс қарқынын арттырып, сапаға баса мән беруді тапсырды. Осыдан соң «Бірлік» шағын ауданындағы сквер құрылысын көріп, одан кейін «Ұлан», «Жетісу» және «Жұлдыз» шағын аудандарын аралаған ол абаттандыру жұмыстарын көзбен көрді. Сондай-ақ, қолға алынған әр жобаның сапалы әрі заманауи талаптарға сай болуы қажет екенін ескертті.
Сала мамандарының мәліметінше, бүгінде облыс орталығында абаттандару жұмыстары қарқынды. Атап айтқанда өткен жылы «Ұлан» шағын аумағында 5 аула ретке келтірілсе, аймақтағы Еркін ауылында 2 аулаға жөндеу жұмыстары жүргізілген. Сонымен қатар, көшелер көріктендіріліп, «Халық қатысатын бюджет» бағдарламасы аясында спорттық жаттығу кешендері мен балалар ойын алаңдары көптеп салынуда. Ал биыл 60-қа жуық аула абаттандырылып жыл соңына қарай ел игілігіне берілмек. Атап айтқанда, мұнда биыл Жетісу облысының орталығындағы «Жұлдыз» шағын ауданында 18, «Жетісу» шағын ауданында 11, «Ұлан» шағын ауданында 9 аула абаттандырылуда. Сонымен қатар «Халық қатысатын бюджет» бағдарламасы аясында тағы 20 аулаға спорттық жаттығу және балалар ойын алаңдары салынбақ.
– Қазір Талдықорған қаласы бойынша 640-қа жуық көше бар. Шаһардағы су құбыры жүргізілген аумақ 600 шақырымнан асады. Осыған байланысты әр жыл сайын қаладағы бірқатар көшелер мен тұрғынүй аулалары абаттандылып, кәріз, су, жарық жүйелері жаңартылуда. Мәселен, бүгінде қаладағы Шахворостов және Құрманов көшелерінде кәріз жүйелерін жаңғырту, Еркін ауылындағы Сарыбұлақ көшесінде су құбырын тарту жұмыстары жүргізілуде. Бастысы қолға алынған әр жоба мерзімінде аяқталуы мен қатар сапалы болуы тиіс. Бүгін аталған бірқатар нысандарды аралап қала әкімінің тапсырмасына сәйкес жауапты адамдарға біраз сын ескертпелер жасалды,– дейді шаһар әкімінің орынбасары.
Айдын КӘЛІМХАН
