Ақсу ауданының Қапал ауылында «Таза Қазақстан» экологиялық акциясы аясында «Жетісудың 7 қазынасы: Тамшыбұлақ» атты игі шара өтті. Табиғи мұраны қорғау, туған өлке тарихын дәріптеу және экологиялық мәдениетті қалыптастыруды мақсат еткен жиында қатысушылар әйгілі Тамшыбұлақ бұлағының маңына ағаш көшеттерін отырғызды. Бұл іс қоршаған ортаға жанашырлық танытудың нақты үлгісіне айналды.
Экологиялық шараны «Jetіsý jastary» коммуналдық мемлекеттік мекемесі ұйымдастырды. Бұл табиғи және тарихи-мәдени нысандарды кеңінен танытуға бағытталған «Жетісудың 7 қазынасы» жобасының алғашқы кезеңі. Қазақстан тәуелсіздігінің 35 жылдығына орай қатысушылар 35 қарағай көшетін отырғызып, табиғатты қорғау ісіне өз үлестерін қосты.
Шараның ашылуында «Jetіsý jastary» КММ директоры Арнай Байжұрынов сөз сөйлеп, жобаның негізгі мақсаттарына тоқталды. Оның айтуынша, бастама көрікті мекендердің тазалығын сақтауға, экологиялық мәдениетті арттыруға және Жетісудың тарихи мұрасын насихаттауға арналған. Сондай-ақ жастар мен қоғамдық белсенділерді табиғат қорғау жұмыстарына қатыстыру, туған өлкенің көрікті жерлеріне деген қызығушылықты арттыру көзделген.
Кездесу барысында Тамшыбұлақтың тарихы мен мәдени-рухани маңызы туралы да әңгіме өрбіді. Өлкенің өткеніне қатысты деректермен «Жетісу» өлкетанушылар орталығы» қоғамдық бірлестігінің мамандары тарихи Жетісу ұғымының қазіргі облыстың әкімшілік шекарасынан әлдеқайда кең екенін айтып, Қапал өңірінің тарихи мұрадағы айрықша орнына назар аударды.
Мұндай шаралардың жас ұрпақтың туған жер тарихын тереңірек тануына, отансүйгіштік сезімін нығайтуына және ұлттық әрі табиғи құндылықтарға құрметпен қарауына ықпалы зор. Спикер «Таза Қазақстан» қозғалысының мәні аумақтарды тазалау мен абаттандырудан әлдеқайда кең екенін де жеткізді. Оның тәрбиелік әрі адамгершілік маңызы адамдарды ел болашағына деген ортақ жауапкершілік төңірегіне топтастыруымен ерекшеленеді.
Ағаш отырғызу жұмыстарына Қапал орман шаруашылығының қызметкерлері де атсалысты. Мекеме директоры Үсен Сабырбеков көшет егу жұмыстары Тәуелсіздіктің 35 жылдығына орайластырылғанын айтты. Оның сөзінше, бұл жасыл желектерді қалпына келтіру және орман алқаптарын кеңейту бағытындағы ауқымды жұмыстың бір бөлігі. Сонымен қатар орман шаруашылығы орман қорын молайтуға арналған республикалық іс-шаралар мен ағаш отырғызу бағдарламаларын жүзеге асыруға қатысып келеді.
Жиынның әсерлі сәттерінің бірі – Қапал ауылының зейнеткер тұрғыны Сәбит Бармақовтың ақ батасын беруі болды. Ақсақалдың тілегі шараның мазмұнын байытып, ұрпақтар сабақтастығының мәнін айшықтай түсті.
Экологиялық шарадан алған әсерімен Қапал кәсіптік-техникалық колледжінің 1-ші курс студенті Диана Әбутәліпова бөлісті. Ол басқосудың түрлі мәдениет өкілдерін бір отбасының мүшелеріндей жақындастырып, жылы лебіздер мен дәстүрлі баталарға ұласқанын жеткізді. Сондай-ақ студент туған ауылының біртіндеп көркейіп, абаттанып, туристер үшін тартымды мекенге айналып келе жатқанын қуанышпен атап өтті.
Көшет отырғызуға студенттер және еріктілермен қатар Қапал ауылдық округі әкімі аппаратының бас маманы Владимир Чепельдің айтуынша, облыстық «Жетісудың 7 қазынасы» жобасының Қапал ауылынан бастау алуы тегін емес. Ерекше табиғи болмысымен танылған Тамшыбұлақ өлкенің басты нышандарының бірі әрі туристерді қызықтыратын көрнекті орын.
– Мұнда әртүрлі жастағы тұрғындар жиналды, жастар да өте көп. Әрқайсысы болашаққа өз үлесін қосқысы келеді. Біздің басты міндетіміз өсіп келе жатқан жас ұрпаққа табиғатқа жанашырлықпен қарауды үйрету, – дейді Владимир Чепель.
Тамшыбұлақ маңына егілген шыршалар ұрпақтар сабақтастығының символына айналды. Бүгінгі еңбек жылдар өте келе табиғи ландшафттың жасыл желегіне қосылып, туған жердің көркін арттыра түспек. Ал тамырын тереңге жайған ағаштар осы игі іске атсалысқан жандардың еңбегін еске салып тұрады.
«Жетісудың 7 қазынасы» жобасы алдағы уақытта да облыстың табиғи және тарихи-мәдени көрікті жерлерін танытуға бағытталған жұмыстарды жалғастыруды көздейді. Оның түпкі мақсаты – туған жерге деген сүйіспеншіліктің нақты іспен дәлелденетінін көрсету. Табиғат тазалығын сақтау, тарихты зерделеу және бай мұраны келер ұрпаққа аманаттау баршаға ортақ міндет.
Қажет АНДАС
