Жетісу облысындағы табиғаты көз тартарлық Солдат шатқалына қарайтын бағыттың қараусыз қалуы жергілікті тұрғындардың алаңдаушылығын тудырды, – деп хабарлайды 7-su.kz ақпараттық порталы tinfo.kz сайтына сілтеме жасап.
Текелі қаласының тұрғындары аймақтағы белгілі туристік аймаққа баратын жолдың біртіндеп жабылып, қалың өсімдік басып бара жатқанын айтып дабыл қағуда. Бұрын бұл бағытпен еркін жүруге мүмкіндік болса, кейінгі жылдары демалыс базасы маңындағы шектеулер салдарынан қатынас қиындаған. Тиісті күтімнің жоқтығынан жол жиегін бұта басып, шағын көшкіндер мен осыптар пайда болған.
Қазір қарапайым көлікпен бұл жерден өту мүмкін емес жағдайға жетті. Мәселенің шешімін табу үшін белсенділер облыс әкімі Бейбіт Исабаевқа арнайы үндеу жолдады. Тұрғындар аталмыш аумақтың құқықтық мәртебесін анықтап, шектеулердің заңдылығын тексеруді және жолды қалпына келтіру шараларын ұйымдастыруды сұрап отыр. Мұнда жаңа асфальт төсеу талап етілмейді, тек бұталардан тазартып, қауіпті учаскелерді жөнге келтіру қажет. Аталған табиғи орын өңірдегі туризмді дамыту үшін үлкен маңызға ие. Сондықтан уақытылы жасалған қадамдар аймақтың экологиялық және туристік әлеуетін сақтап қалуға жол ашады.
