Келер жылдан бастап байланыс қызметінің тарифтері төмендейді. Бұл туралы бүгін Үкіметтің селекторлық режимдегі отырысында ҚР Ақпарат және коммуникациялар вице-министрі Динара ЩЕГЛОВА айтты.
«Қазіргі уақытта кабельдік кәріз жүйелерін жалға беру қызметтік тарифтерін, сонымен қатар, ауылдарда кабельдік телефон мен интернеттің субсидияланған тарифтерін реттеу министрлік құзыретінде. Кабельдік қызметтер заңды тұлғаларға көрсетіліп, тарифттері соңғы 2 жылдың ішінде өзгерген жоқ», — деді ол. Вице-министрдің дерегінше, кабельдік телефон және интернет тарифтері ауылдық тұрғындарға 2013 жылдан бастап, өз құнынан төмен бағамен қызмет көрсетті. Атап айтқанда, ауылдарда кабельдік телефон тарифі — 596 теңге, ал өзіндік құны — 1125 теңге. Ауылдарда интернет тарифі 982 теңгеден 1964 теңгеге дейін. Ал оның өзіндік құны 2932 теңгені құрайды.
— Ауылдық жерлерде осы қызмет көрсету бойынша өтемақы бюджет есебінен жасалады. Ағымдағы жылы осы қызметтерді субсидиялауға 8,7 миллиард теңге бөлінген. Дүниежүзілік экономикалық форумның жаһандық бәсекеге қабілеттілік индексінде байланыс қызметтерінің тарифтері бойынша Қазақстан 140 елдің ішінде 29-орында. Ал бекітілген кең жолақты интернет қызметтері бойынша 20-орында тұр, — деді ол.
Динара Щеглованың сөзіне қарағанда, ҚР Премьер-Министрінің тапсырмасын орындау мақсатында байланыс қызметтерін төмендету бойынша «Қазақтелеком», «Транстелеком», «Қазтранском», «КCell», «ҚарТел», «Mobile» байланыс операторларымен келіссөз жүргізілген. Нәтижесінде, келесі айдың аяғына дейін қолжетімді әлеуметтік тарифтер пакетін әзірлеп, байланыс бағасын төмендету ұсынылды. Аталған тарифтік пакеттер бойынша ақпарат БАҚ-та жарияланады.
«ҚАЗАҚПАРАТ»
