2025 жылдың шілде-қыркүйек айлары аралығында TikTok платформасы Қазақстанда қауымдастық ережелерін бұзғаны үшін 1,5 миллионнан астам видеороликті өшірді, – деп хабарлайды 7-su.kz ақпараттық порталы BAQ.KZ дерегіне сүйеніп.
Бұл туралы компания 10 ақпанда Қауіпсіз интернет күніне орай мәлімдеді.
Компания есебіне сәйкес, 2025 жылдың үшінші тоқсанында республика аумағында 1 567 613 видео жойылған. Контенттің 99,7%-ы пайдаланушылардың шағымынсыз, яғни проактивті түрде бұғатталған. Ал роликтердің 94,8%-ы жарияланғаннан кейін алғашқы 24 сағат ішінде өшірілген. Бұл көрсеткіш әлемдік орташа деңгейден жоғары.
Салыстыру үшін, 2025 жылдың екінші тоқсанында (сәуір-маусым) Қазақстанда 1,4 миллионнан астам видео жойылған. Осылайша, үшінші тоқсанда өшірілген контент көлемі артқан.
Компания дерегінше, 2025 жылдың үшінші тоқсанында әлем бойынша қауымдастық ережелерін бұзған 200 миллионнан астам видео өшірілген. Оның 99,3%-ы проактивті түрде бұғатталса, 94,8%-ы жарияланғаннан кейін бір тәулік ішінде жойылған.
Сонымен қатар платформа тікелей эфирлердің қауіпсіздігіне ерекше назар аударатынын мәлімдеді. 2025 жылдың үшінші тоқсанында әлемде 32 миллионнан астам LIVE-трансляция бұғатталған.
TikTok тікелей эфирлерді монетизациялау үдерісіне қатысты бақылау шаралары туралы да ақпарат таратты. Компанияның мәліметінше, алдымен авторларға ескерту жасалады. Бұл олардың контенті ережелерге қайшы болуы мүмкін екенін түсінуге және өзгеріс енгізуге мүмкіндік береді. Егер заңбұзушылықтар жалғасса, платформа автордың тікелей эфирлердегі табыс табу мүмкіндігін шектеуі мүмкін.
2025 жылдың екінші тоқсанында 2 321 813 трансляция мен 1 040 356 стримерге ескерту және демонетизация шаралары қолданылған. Ал үшінші тоқсанда шектеу қойылған эфирлер саны 69%-ға өсіп, 3 914 684-ке жеткен. Шектеуге ұшыраған аккаунттар саны 2,1 миллионнан асқан.
Сарапшылардың пікірінше, мұндай статистика әлеуметтік желілердегі контентті бақылау тетіктерінің күшейгенін көрсетеді. Сонымен бірге, бұл көрсеткіштер онлайн-платформаларда қауіпсіздік талаптарының қатаң сақталып отырғанын аңғартады.
