Тіл сарайында облыстық ономастика комиссиясының отырысы өтті. Жыл басында зерделеу жұмыстары жүріп, нәтижесінде тілдік заң талаптарын бұзған жайттар анықталған. Бұл әсіресе Алакөл мен Панфилов аудандарында жиі кездескен. Жиында бұдан өзге мәселелер де талқыланды.
Қоғамдық даму басқармасының басшысы Бауыржан Әбибеков Қазақстан Республикасындағы «Тіл туралы» Заңға сәйкес Алакөл және Панфилов аудандарында жүргізілген рейдтік тексерулердің нәтижелеріне, ономастика саласындағы өзгерістерге тоқталды.
Панфилов ауданы әкімінің орынбасары Қанат Досмайылов пен Алакөл аудандық ішкі саясат, мәдениет, тілдерді дамыту және спорт бөлімінің басшысы Бейбіт Айтахметов «Тіл туралы» Заңына сәйкес ономастика және көрнекі ақпарат мәтіндері бойынша өз аудандарында атқарылып жатқан жұмыстар, тексерулер барысында анықталған олқылықтарды жою туралы баяндады. Сонымен қатар жиында Жеңістің 80 жылдығына орай соғыс ардагерлерінің есімін көше, мектеп, тағы да басқа мекемелерге беру мәселесі талқыланды. Қазіргі күні 60-тан аса ұсыныс келіп түскені айтылды.
Басқосуда облыстық Азаматтық альянстың президенті, Жетісу өңірі қоғамдық кеңесінің мүшесі Дания Қыдырбаева Ұлттық құрылтайдың IV отырысында сөз болған ономастика саласын жетілдіру туралы пікірімен бөлісті.
Шара соңында облыс әкімінің орынбасары Диас Есдәулетов аудан және қала басшылығының өкілдеріне идеологиялық тұрғыдан ескірген елді мекен, көше, мемлекет меншігіндегі нысандардың атауларына талдау жүргізуге, әлеуметтік шиеленісті болдырмау қажеттігін айтты. Сонымен қатар халықтың пікірін ескере отырып түсіндіру жұмыстарын жүргізуге, көше аншлактарын жазу және орналастыру, реттеу шараларын жүзеге асыруға, тарихи атаулардың сақталуын қатаң басшылыққа алуға, көрнекі ақпараттардың Қазақстан Республикасындағы «Тіл туралы» Заңына сәйкес жазылуын бақылауға алуға тапсырма берді.
Ясин ОРАЛБЕК
Суретті түсірген Дмитрий ЕРОФЕЕВ
