«Jetisy jastary» КММ-нің ұйымдастыруымен жастар арасында «Тəуелсіз жастар алаңы» атты республикалық пікірсайыс турнирі өтті.
Турнирге əр облыстан жəне республикалық маңызы бар қалалардан 20 команда қатысты.
Қазақ тілінде әрі АПФ форматында өткен сайысқа жалпы саны 50 адам 3 іріктеу кезеңдері бойынша қатысып, өзара мықтыны анықтады. Пікірсайысшылар қазіргі таңда жастар арасындағы өзекті саналатын 8 түрлі тақырыпты талқылады.
Турнир қорытындысы бойынша жеңімпаздар анықталып, жүлделі орындарға қомақты қаржы берілсе, «Үздік спикер», «Үздік төреші» номинацияларына 100 мың теңгеден ақшалай сыйақы табысталды.
Жалпы алғанда Алматы облысынын «Ескелді би» командасы 1-орын, Астана қаласының «Адамгершілік» командасы 2-орын, алматылық «Мастер класс» командасы 3-орын иегері деп танылды. Жоғарыда атап өткен қос аталым бойынша Шыңғыс Қызырхан мен Еркежан Ардашқызы марапатталды.
Айта кетерлігі, сыни ойлауды дамыту, мəдениетті қалыптастыру, төзімділік, мəселені шешуге көптеген көзқарасты тануды үйретуді мақсат тұтқан пікірсайыс турнирінде тəжірибесі бар, білікті мамандар төрелік етті.
«Жетісу-Ақпарат»
