Туризмді дамыту – Жетісу жеріндегі басым бағыттардың бірі. Облыстық кәсіпкерлер палатасының өкілдері қытайға барып, Шыңжаң — Ұйғыр автономиялық ауданында туристік нысандар бойынша симпозиумға қатысты.
Аталған іс-шарада Қытай — Қазақстан туризмінің келешегі туралы талқыланды. Өйткені, достық қарым-қатынастағы көрші елдер. Екі мемлекет те туристік ресурстарға бай және даму үшін үлкен әлеуетке ие. Қазақстан өңдеу мен игеруде бірегей экологиялық ресурстарға бай. Сондай-ақ, қаржылық салымдар бойынша табысты іске асырылуы мүмкін көптеген жоба бар. Алайда, Қытай-Қазақстан туризмін дамытуда кедергілер кездеседі. Сол себепті халықаралық іс-шарада оларды шешу жолдарының мүмкіндіктері қарастырылды.
Екі ел арасында визасыз режим қолданылады. Онда азаматтардың мемлекеттер аумағында болу мерзімі 30 күннен аспау керек. Қазір екі ел үшін де туристік сала бойынша туындаған мәселе көп. Шекарада туристік маршрут жоқ. Туристердің өтуі жалпы арнайы жүру орны арқылы жүзеге асырылады, бұл өз кезегінде маршруттардың өтуін қиындатады. Сондықтан да туристер үшін жеке көлік түрі қажет. Осы ретте кедендік бақылаудан жедел өту үшін туристік компаниялардан тізімдерді алдын ала беру туралы ұсыныс енгізілді.
Бұл мәселемен қатар электронды коммерция бөлігінде туындайтын қиындықтар да талқыланды. Қазір елдің көптеген азаматы онлайн тауарлар сатып алады. Бірақ, тауарлардың транзиті қиын. Елдердің шекараларында кідіріс бар. Қауіпсіздік тексерулерінен өту, тауарды бөлу, «Қазпошта» арқылы почта-логистикалық қызметтерден өту көп уақыт алады. Жеке компаниялар тауарларды бөлек тасымалдай алмайды. Электронды коммерцияның дамуы бизнестің өрлеуіне мүмкіндік береді.
Өз кезегінде облыстық кәсіпкерлер палатасының төрағасы Дәурен Оңалбаев іс-шараның маңыздылығын атап өтіп, айтылған проблеманың бәрі хаттамаларда көрініс табатынын және табысты әріптестік алдымен оларды шешу жолдарын іздестіруде құрылатынын жеткізді.
Айгүл Байжұмақызы
Фото: russian.cgtn.com
