Сарқан қаласындағы №349 сайлау учаскесінде Құрылтай сайлауы қарсаңында ұлттық нақыштағы би флешмобы ұйымдастырылды. Мәдени шараның басты мақсаты – тұрғындарға көтеріңкі көңіл-күй сыйлап, ұлттық өнер мен дәстүрді дәріптеу арқылы қоғамдық белсенділікті арттыру.
Флешмобқа қатысушылар қазақ халқының ұлттық киімдерін киіп, дәстүрлі әуенге әсем би орындады. Қатысушылардың үйлесімді қимылы мен ұлттық нақыштағы киімдері шараға ерекше сән беріп, сайлау учаскесіне келген тұрғындардың назарын аударды.
Ұлттық би – халқымыздың мәдениеті мен салт-дәстүрін танытатын өнердің маңызды түрі. Сондықтан осындай мәдени бастамалардың сайлау күні ұйымдастырылуы тұрғындарға ерекше әсер қалдырып, елдің мәдени құндылықтарын кеңінен насихаттауға мүмкіндік берді.
Шара барысында тұрғындар мен сайлаушылар өнерпаздарға қолдау көрсетіп, флешмобты қызығушылықпен тамашалады. Көтеріңкі көңіл-күйге бөленген көпшілік ұлттық өнердің әсемдігіне куә болды.
№349 сайлау учаскесіндегі ұлттық нақыштағы би флешмобы ел бірлігі, ұлттық құндылық және азаматтық белсенділікті ұштастырған мазмұнды мәдени шара болды. Мұндай бастамалар жастардың ұлттық өнерге қызығушылығын арттырып, дәстүрді дәріптеуге жол ашады.
