Ұлттық құрылтай қоғам мен мемлекет арасындағы өзара байланысты нығайтып, ел дамуына қатысты маңызды мәселелерді талқылайтын қоғамдық диалог алаңына айналып келеді. Бұл институттың басты ерекшелігі – әртүрлі әлеуметтік топтар мен қоғамдық орта өкілдерінің пікірін бір арнаға тоғыстырып, өзекті мәселелерді ашық талқылауға мүмкіндік беруі.
Ұлттық құрылтайдың жұмысы елдегі қоғамдық пікірді ескеруге және азаматтардың мемлекеттік саясатты қалыптастыру үдерісіне қатысу мүмкіндігін кеңейтуге бағытталған. Жиындар барысында қоғамның түрлі саласына қатысты ұсыныстар айтылып, оларды іске асырудың нақты жолдары қарастырылады.
Құрылтай аясында әлеуметтік саясат, білім мен ғылым, мәдениет, жастар мәселесі, ұлттық құндылықтар, өңірлердің дамуы, заң мен тәртіп, қоғамдық жауапкершілік сияқты бағыттар бойынша пікірлер ортаға салынады. Мұндай талқылаулар мемлекеттік органдар мен қоғам өкілдері арасындағы байланысты күшейтіп, азаматтардың ұсыныстарына назар аударуға жол ашады.
Құрылтайдың маңызын арттыратын негізгі факторлардың бірі – онда көтерілген мәселелердің нақты шешімдермен сабақтасуы. Қоғамдық пікірде айтылған ұсыныстар тиісті мемлекеттік органдардың жұмысына енгізіліп, заңнамалық және ұйымдастырушылық шешімдер қабылдауға негіз болады.
Бұл ретте Құрылтай мүшелерінің міндеті тек мәселе көтерумен шектелмейді. Елдегі өзгерістерге азаматтық тұрғыдан баға беріп, қоғамның сұранысын жеткізу, нақты ұсыныстар ұсыну және олардың жүзеге асуына атсалысу да маңызды.
Ашық пікір алмасу мемлекеттік шешімдердің қоғам қажеттілігіне жақын болуына ықпал етеді. Сонымен қатар азаматтардың өзекті мәселелерді талқылауға қатысуы қоғамдық жауапкершіліктің артуына мүмкіндік береді.
Қоғамдық диалогтың орнықты болуы үшін пікір алуандығы мен өзара құрмет қатар жүруі қажет. Құрылтай осы қағидаларды ұстана отырып, елдің әртүрлі әлеуметтік және кәсіби топтарының үнін естуге мүмкіндік беретін алаң ретінде қалыптасып отыр.
Қоғамда түрлі пікірдің болуы – табиғи құбылыс. Маңыздысы – сол пікірлерді ортақ мақсат төңірегінде тоғыстырып, елдің тұрақты дамуына бағыттау. Осы тұрғыдан алғанда, Құрылтайдың жұмысы қоғамдық келісімді нығайтуға және азаматтық жауапкершілікті арттыруға ықпал етеді.
Әсіресе ұлттық құндылықтарды сақтау, өскелең ұрпақтың тәрбиесі, мемлекеттік тілдің қолданыс аясын кеңейту, еңбек мәдениеті мен заңға құрмет қалыптастыру мәселелері қоғамның тұрақты назарында болуы тиіс. Бұл бағыттар тек мемлекеттік органдардың ғана емес, бүкіл қоғамның ортақ міндетін талап етеді.
Ел дамуының негізгі көрсеткіштері өңірлердегі нақты жағдаймен тікелей байланысты. Сондықтан аймақтарда қордаланған мәселелердің республикалық деңгейдегі талқылауларға шығарылуы маңызды.
Инфрақұрылым, ауыл шаруашылығы, жұмыспен қамту, жастарға мүмкіндік жасау, білім беру, денсаулық сақтау және әлеуметтік қолдау мәселелері әр өңірде өзіндік ерекшелікке ие. Осы мәселелерді жергілікті тұрғындардың пікірін ескере отырып қарастыру тиімді шешім қабылдауға мүмкіндік береді.
Жетісу секілді ауыл шаруашылығы, туризм және кәсіпкерлік қатар дамып келе жатқан өңірлер үшін де қоғамдық диалогтың маңызы зор. Аймақтың әлеуметтік-экономикалық әлеуетін арттырумен қатар, тұрғындардың күнделікті мәселелерін шешу, жастардың бастамаларын қолдау және ауылдық елді мекендердің дамуына жағдай жасау өзекті бағыттардың қатарында.
Құрылтайдың қоғамдық маңызы оның жұмысына қатысушылардың белсенділігімен ғана емес, қоғамның айтылған ұсыныстарға деген көзқарасымен де өлшенеді. Мемлекет пен азаматтар арасындағы диалог екіжақты болған жағдайда ғана нәтижелі болады.
Бұл ретте мемлекет тарапынан ашықтық пен кері байланыс қамтамасыз етілсе, азаматтар тарапынан сындарлы ұсыныс пен жауапкершілік қажет. Осындай өзара түсіністік қалыптасқан жағдайда қоғамдық диалог нақты нәтижеге бағытталады.
Ұлттық құрылтайдың басты құндылығы да осында. Ол қоғамдағы түрлі пікірлерді тыңдап қана қоймай, оларды елдің ортақ мүддесімен ұштастыруға мүмкіндік береді. Сондықтан Құрылтайды қоғамдық пікір мен мемлекеттік саясаттың арасындағы байланысты күшейтетін маңызды институт ретінде бағалауға болады.
Елдің болашағына қатысты шешімдер қоғамның белсенді қатысуынсыз толыққанды жүзеге аспайды. Ал ашық диалог, өзара сенім және ортақ жауапкершілік – тұрақты дамудың негізгі шарттарының бірі.
«Жетісу-Ақпарат»
