Қазақстанда әйелдерге арналған «Ұмай» ипотекалық бағдарламасына өтініш қабылдау басталды. Өтінімдер 31 тамыздан бастап қабылданады. Бағдарлама жеке баспанасын алғысы келетін жұмыс істейтін әйелдерге арналған, – деп хабарлайды 7-su.kz ақпараттық порталы Ulysmedia.kz сайтына сілтеме жасап.
«Ұмай» – мемлекеттік бағдарлама емес. Жобаны қаржыландыруға Азия даму банкінің қаражаты тартылған. Өтініштер несие қаражатының түсуіне қарай қаралады, конкурстық іріктеу жүргізілмейді. Бағдарламаның алғашқы траншы 9 млрд теңгені құрайды.
Ипотеканың негізгі шарттары қандай?
Бағдарлама бойынша несие жылдық 14,8% мөлшерлемемен беріледі. Жылдық тиімді сыйақы мөлшерлемесі (ЖТСМ) 16,3%-дан 16,8%-ға дейін.
Негізгі талаптар:
- несие сомасы – 50 млн теңгеге дейін;
- Астана мен Алматыда бастапқы жарна – кемінде 20%;
- басқа өңірлерде бастапқы жарна – кемінде 15%;
- отбасының орташа айлық таза табысы 1,25 млн теңгеден аспауы тиіс;
- төлем қабілетін растау үшін соңғы 6 айдағы ресми табыс қажет;
- өтініш берушінің атында басқа жылжымайтын мүліктің болуы бағдарламаға қатысуға кедергі емес;
- баспананы Қазақстанның кез келген қаласынан сатып алуға болады;
- тіркеу мекенжайына байланысты шектеу қойылмайды.
Қандай баспана алуға болады?
«Ұмай» бағдарламасы арқылы бірнеше санаттағы тұрғын үйді сатып алуға мүмкіндік бар.
Оның ішінде:
- пайдалануға берілген бастапқы нарықтағы тұрғын үй;
- құрылыс кезеңіндегі, Тұрғын үй құрылыс кепілдігі (ҚТК) немесе сақтандыру тетігі бар тұрғын үй;
- 2016 жылдан бері салынған екінші нарықтағы тұрғын үй.
Бастапқы нарықтағы тұрғын үйді Baspana Market арқылы таңдауға болады.
30 млн теңгелік пәтер үшін қанша төленеді?
Бағдарламаның шарттарын нақты мысалмен түсіндіруге болады. Мәселен, Алматыдан құны 30 млн теңге болатын пәтер алынды делік.
Егер бастапқы жарна 20% болса, қарыз алушы 6 млн теңгені өз қаражатынан төлейді. Қалған 24 млн теңге банк несиесі арқылы қаржыландырылады.
Бұл ретте банк несие көлемін пәтердің сату бағасы мен бағалау құнының төменгі көрсеткішіне сүйеніп есептейді.
Мысалы, тұрғын үйдің сату бағасы 32 млн теңге, ал бағалаушы оның құнын 30 млн теңге деп белгілесе, банк 32 млн емес, 30 млн теңгенің 80%-ын, яғни 24 млн теңгені ғана қаржыландырады.
Ай сайынғы төлем қанша болады?
24 млн теңге көлемінде несие алған жағдайда алғашқы 10 жылдағы ай сайынғы төлем шамамен:
- депозитте жинақ болмаса – 387 200 теңге;
- депозитте 2,4 млн теңге жинақ болса – 365 600 теңге.
Осылайша, депозиттегі 2,4 млн теңге жинақ ай сайынғы төлемді шамамен 21 600 теңгеге азайтады.
Бағдарламада Отбасы банкіндегі тұрғын үй жинағы көбейген сайын ай сайынғы төлемнің де төмендеу мүмкіндігі қарастырылған. Ал алғашқы 10 жыл аяқталғаннан кейін қарыз алушы тұрғын үй заемына ауысады. Бұл кезеңде мөлшерлеме мен ай сайынғы төлем төмендейді.
Нақты мөлшерлеме мен төлем көлемі депозиттегі жинақ көлеміне және басқа да жеке көрсеткіштерге байланысты есептеледі.
«Ұмай» бағдарламасына кімдер қатыса алады?
Бағдарлама Қазақстанда жұмыс істейтін әйелдерге бағытталған. Қатысу үшін тұрақты ресми табыстың болуы қажет.
Әйелдің отбасылық жағдайы немесе атында басқа тұрғын үйдің болуы бағдарламаға қатысуға кедергі келтірмейді.
Өтінішті Отбасы банкінің бөлімшесі арқылы немесе қашықтан беруге болады. Онлайн өтініш беру үшін банктің бейнеқызметі мен Baspana Market-тегі жеке кабинетін пайдалануға мүмкіндік бар.
Өтініштер конкурстық негізде емес, несие қаражатының түсуіне қарай қаралады. Сондықтан бағдарламаға қатысқысы келетін азаматтарға құжаттары мен төлем қабілетін алдын ала дайындап қойған жөн.
