«Әділет» партиясы атынан Құрылтай депутаттығына кандидаттар өңірлерге сапарын жалғастыруда. Штаб мүшелері Талдықорғандағы «Жетісу» волейбол клубының ғимаратында кездесті.
Кандидаттар спортшыларға партияның сайлауалды бағдарламасын таныстырды. Биыл Қазақстан чемпионы атанып, ел біріншілігін оныншы рет жеңіп алған «Жетісу» әйелдер волейбол командасы партияның бастамаларын қолдайтынын жеткізді. Жиында әлеуметтік инфрақұрылымды жаңғырту мәселелері талқыланды. Бұл бағыт Мемлекет басшысы Қасым-Жомарт Тоқаевтың дені сау ұлт қалыптастыру және адами капиталды дамыту жөніндегі саясатымен үндеседі.
Жүздесуде спортшылар ауылдық жерлердегі спорт секцияларына қолжетімділік мәселесін көтерді. Осыған байланысты Құрылтай депутаттығына кандидат Максим Рожин партияның «Саламаттышаңырақ» және «Саламатты мектеп» жобаларының негізгі бағыттарын таныстырды. Партия мектеп және студенттер арасында қазақ күресі, тоғызқұмалақ, асық атудан спорт лигаларын дамытуды жоспарлап отыр.
«Әділет» партиясы 2029 жылға қарай ел тұрғындарының кемінде 50 пайызын спортпен тұрақты айналысуға тартуды мақсат етіп отыр. Осыған орай ауылдарда модульдік спорт нысандарын салуды жалғастыру, ел бойынша тірек спорт кешендерін жаңғырту және жаттықтырушылар мен оқытушыларға ынталандыру үстемақысын енгізу көзделген.
Кездесу барысында «Жетісу» клубының волейболшысы Назгүл Мақұлбек кандидаттарға естелік ретінде волейбол добын табыстап, алдағы сайлауда сәттілік тіледі.
«Жетісу» волейбол клубы еліміздің ең үздік командаларының бірі. Біз Ұлттық лиганың он дүркін Қазақстан чемпионымыз, суперкубоктың үш мәрте иегеріміз. «Жетісудың» атынан осы допты сізге жақсы ниетпен сыйға таратамыз. Алдағы сайлауға сіздерге жеңіс тілейміз, – деді ол.
Кездесу соңында партия төрағасы Айбек Дәдебай әлеуметтік әділеттілік пен барша азаматқа тең мүмкіндік жасаудың маңызына тоқталды.
Қалада да, ауылдық жерлерде де спортпен айналысуға тең мүмкіндік жасау маңызды. Сондықтан біз балалар-жасөспірімдер спортын дамытуды, спорт мектептерінің материалдық базасын нығайтуды және өңірлердегі қолжетімді инфрақұрылымды кеңейтуді ұсынамыз. Бұл ретте спортшыларды даярлауда негізгі рөл жаттықтырушыларға тиесілі. Олардың еңбегі лайықты бағалануы керек. Партияның сайлауалды бағдарламасында спортшылардың нәтижелері мен дамуы үшін ынталандыру төлемдері жүйесін енгізу көзделген. Біздің міндетіміз – әрбір дарынды бала тұрғылықты жеріне қарамастан өз әлеуетін көрсете алатын жағдай жасау, – деді ол.
Жетісу облысына сапар аясында кандидаттар өңірдегі ауыл шаруашылығы өкілдерімен, қоғам белсенділерімен және ірі еңбек ұжымдарының мүшелерімен де кездесті.
Бұдан бөлек «Әділет» партиясының мобильді керуені де өңірдегі шалғай елді мекендерді аралады. Керуен құрамындағы партия өкілдері, белсенділер мен сарапшылар Үшарал және Сарқан қалаларына, сондай-ақ Жансүгіров, Балпық би және Сарыөзек ауылдарына барып, тұрғындармен жүздесті. Олар ауыл тұрғындарының ұсыныс-тілектерін тыңдап, сайлауалды бастама аясында көтерілген мәселелерді жинақтады.
Жетісу облысындағы кездесулерге барлығы 880 сайлаушы қатысып, партия өкілдерімен пікір алмасты. Ең көп адам қатысқан кездесу Сарыөзек ауылында өтті. Оған 250 тұрғын қатысты.
Дайындаған: «Әділет» партиясының баспасөз қызметі.
«Әділет» партиясы» ҚБ сайлау қорының қаражаты есебінен төленді.
Тапсырыс беруші: Н.Т. Мыңжасаров
