Облыс орталығындағы тазалық жұмыстары қарқынды жүріп жатыр. Талдықорған қаласының әкімі Ернат Бәзіл өзі бастап тұрғындарға арнайы үндеу де жариялап, тазалық жұмыстарына бір адамдай атсалысуға шақырған еді. Қалада екі тәулік ішінде екі мың тоннаға жуық қоқыс шығарылды.
«Таза Қазақстан» бағдарламасы аясында өткен сенбіге жоспарланған тазалық жұмыстары ауа райының қолайсыздығына байланысты өтпеді. Алайда бұл жағдайға қарамастан коммуналдық қызметкерлер сенбі-жексенбі күндері қала аумағында тұрғындар шығарған тұрмыстық қоқыстарды жинады. Нәтижесінде қала аумағынан 1800 тонна қоқыс шығарылды. Қоқысты тазалап, шығаруда 67 арнайы техника жұмыс істесе, халық та белсенділік танытып, өз үлестерін қосты.
Қала әкімінің орынбасары Қуаныш Сейтімбетов:
– Тазалық акциясы 31 наурыздан басталған болатын. Жеке сектор мен көпқабатты тұрғын үй аумақтарынан қатты тұрмыстық қалдықтар жинау жұмыстары кең ауқымда жүргізіліп, екі тәулікте 2 мың тоннаға жуық қоқыс жиналып, шығарылды. Бұл жұмыстар әлі де жалғасады, – деп атап өтті.
Қали АСҚАР
Фото: qazvolunteer.kz
