Үйдің үлкендері бізге үнемі «бауырдан артық ешкімді таппайсыңдар» деп айтып отырады. Тату болуға, үлкені кішіге қамқорлық көрсетуге, кішісі үлкенін құрметтеуге тиіс деп үйретеді. Өз басым әпке, қарындастарымды, інімді өте қатты жақсы көремін.
Есімім Алғыр. Біз бес ағайындымыз. Менің Фариза, Ұлпан есімді әпкелерім және Сағыныш қарындасым мен Қалқаман атты інім бар. Олар мен үшін тіршіліктегі ең жақын адамдар. Біз бес ағайынды болсақ та мінезіміз бір-бірімізге ұқсамаған. Сондықтан әртүрлі ойланамыз, басқаша армандаймыз.
Менің басты міндетім – қарындасым мен ініме қамқорлық көрсету. Оларға өз білгенімді үйретіп, жақсы болып өсуіне көмегімді тигізуім керек.
Бауырларыммен біз әрқашан бірге ойнаймыз, олардың көңілді жүргені мені қатты қуантады. Фариза мен Ұлпан әпкемнің айтқан ақылдарына құлақ асып, жадымда ұстап жүруге тырысамын.
Адамды дұрыс іс қылуға жетелейтін жанашырлық қасиеті ғой, сол қасиетті барлық бір туғандарымның бойынан көремін. Әпкелерім, қарындасым мен інімнің өсіп, жақсы оқу орындарында оқып, көп жетістікке жеткендерін қалаймын. Бауырларыммен биікпін, солармен асқақпын.
Алғыр ҚАРҚЫН,
3-сынып оқушысы
