Талдықорған қаласының әкімі Ернат Бәзіл облыс орталығындағы «Жанұя» отбасын қолдау орталығының жұмысымен танысты.
Осы барыста шаһар басшысы орталықтағы жаңа өмір бастап, әртүрлі санаттағы көмек алып, оқу курстарынан өтіп жатқан арулармен тілдесіп, оларға әкімдік тарапынан әрқашан қолдау көрсетілетінін жеткізді.
Аталған орталықтың негізгі міндеті – өңірдегі қиын жағдайға тап болған қыз-келіншектерге психологиялық, әлеуметтік және заңгерлік көмек көрсету. Сондай-ақ, отбасы институтын жан-жақты қолдап, қысқа мерзімді оқу курстарын ұсынатын, «бір терезе» қағидаты бойынша қызмет көрсететін бірден-бір мекеме.
«Жанұя» орталығының мәліметінше, өткен жылы мекемеге 690-нан астам адам келіп, оларға 750-ге жуық қызмет түрі көрсетілген. Қол ұшын беруді сұрай келгендердің 121-і психолог, 88-і балалар мен ересектердегі сөйлеуді зерттеу және түзету мамандарының, 131-і заңгерлер мен 122 адам әлеуметтік қызметкерлердің көмегіне жүгінген. Ал 2024 жылдың мамыр айынан бері барлығы 85 ана әртүрлі қысқа мерзімді оқу куыстарынан өтіп, өз кәсібін бастауына мүмкіндік алған. Атап айтқанда, білім алушылар бет әрлеу, компьютерлік сауаттылық, шаштараз, тігіншілік және массаж мамандықтарын үйренген. Бұл бағыттағы жұмыстар биылғы жылы да жалғасын таппақ.
– Талдықорған қаласындағы бұл мекеме аз қамтылған және көпбалалы отбасыларға көмек көрсетуге арналған әлеуметтік орталық. Осыдан бірнеше жыл бұрын шаһардағы жұмыспен қамту, әлеуметтік бағдарламалар және азаматтық хал актілерін тіркеу бөлімінің бастамасымен құрылған. Міне, содан бері бұл орын Жетісу облысының орталығындағы әлеуметтік әлсіз отбасылардың өмір сүру сапасын арттыру, азаматтардың экономикалық және өмірлік қиын жағдайдан шығуы үшін жеке мәселелерін нығайту бағытында жұмыс атқарып келеді. Бүгінгі күнге дейін орталыққа 8 мыңға жуық адам жүгініп, 4 мыңнан астам адамға психологиялық көмек көрсетілді,– дейді орталық жауаптысы.
Айдын КӘЛІМХАН
