Әйел – әлем. Ал осынау әлемнің әдемі, сұлу, мейірімді, жанашыр болғанын бәріміздің қалайтынымыз анық. Олай болса, неге көктемдей құлпырған нәзік жандыларға бар ізгі-құрметті көрсетіп, жылы сөзімізді арнап, олардың одан әрмен құлпыра түсуіне жағдай жасамаймыз? Бүгінгі қызғалдақтай құлпырған қыздарымыз ертең бір отбасының, әулеттің шаңырағына шаттық ұялатып, ырысын еселейтін дана анаға айналады.
Әйел өзінің табиғатынан-ақ кішіпейілділіктің, жоғары адамгершіліктің және мейірімділіктің айнасы. Сондықтан ол бүкіл қоғамның арқауы ретінде келісім мен тұрақтылықтың нығаюына ықпал етеді.
Шыр етіп мынау жарық дүниенің есігін ашқан сәттен бастап сенің ең бір жақын адамыңа айналатын, кейін келе сырлас досың, өмірлік ұстазың болатын асыл жанның, аяулы ананың қабағына кірбің ұялатуға ешкімнің қақы жоқ. Қара жерді баспай, есіңді білмей жатып, тырмысып жабысатының, шырылдап, уанбай жылап сенің іздейтінің тек бір адам. Ол – ана. Сен үшін құрметті жан бәрінен де қымбат. Міне, анаға деген махаббат сенің құндақтаулы жатқан күніңнен-ақ басталады. Сондықтан да біздер жақсылық атаулының барлығын да анаға арнауымыз керек. Бүгінгі жастарымыз ана алдындағы перзенттік парызын адал өткеріп, аяулы жанның ақ батасын алып, көктеп-көгерсе деймін.
Жер дүниенің жаңарып, әлем құлпыратын көктемнің алғашқы мерекесінде жанымыз жабырқамай, тыныштық пен берекеде сыйласып ғұмыр кешуді бұйыртсын! Біз үшін ата-ана, ағайын-туыс қандай ыстық болса қасиетті Отанымыз да дәл сондай ыстық. Сондықтан да егемен еліміздің еңсесі биік, мәртебесі жоғары болсын деген аналық тілегімді барша Жетісу жұртшылығына арнаймын.
Оразгүл АСАНҒАЗЫ,
қоғам қайраткері
