Үндістанда ІІІ Үндістан-Орталық Азия жастар форумы өтті. Қазақстаннан таңдалған жастар делегациясы Дели және Агра қаласына, Гоа штатына сапар шегіп, мәдени және дипломатиялық алмасу бағдарламасына қатысты. Олардың қатарында жетісулық жастар да бар.
Халықаралық іс-шараның басты мақсаты – достық байланыстарды нығайту және жастарды Үндістанның мәдениетімен таныстырып, заманауи дамуын көруге мүмкіндік беру.
Форумның алғашқы күні қатысушылар Аграға сапарлап, әлемнің жеті кереметінің бірі – Тәж Махал кесенесін аралады. Тұтастай ақ мәрмәрдан тұрғызылған сәулет өнері жастарды тамсандырмай қоймады.
Келесі күні бес елдің делегациясы Гоа штатына аттанды. Күн, құм және теңіз өлкесі саналатын Гоа Үндістанның бай штатының бірі саналады. Шараға қатысушы жастар штаттың сауда және өнеркәсіп палатасы басшыларымен, Жастар ісі және спорт министрлігінің өкілдерімен кездесіп, губернатордың және бас министрдің жеке қабылдауында болды. Сондай-ақ, қаладағы менеджмент институтына ат басын бұрып, плантацияны аралады.
Қазақстан делегациясы құрамындағы Жетісу облысы атынан барған «Жетісу жастары» мекемесі директорының орынбасары Арнай Байжұрыновтан Үндістанда өткен форум жөніндегі пікірін тыңдадық.
– Үндістанда өткен ІІІ Жастар форумы — өмірімдегі ең ерекше әрі маңызды оқиғалардың бірі. Жетісу облысының атынан халықаралық деңгейде жастармен тәжірибе алмасу үлкен мәртебе. Форумда әртүрлі елден келген жас көшбасшылармен танысып, олардың идеяларын тыңдадық. Бұл тек халықаралық байланыс емес, мәдениеттер тоғысы, жаңа мүмкіндіктерге жол ашқан диалог алаңы болды. Бірлік пен түсіністікке құрылған ортада мен Қазақстан жастарының белсенділігін, бастамашылдығын көрсете алдым деп ойлаймын. Үндістанның бай мәдениеті, қонақжай халқы да керемет әсер қалдырды. Осындай форумдар бізге үлкен шабыт береді, жаңа мақсаттарға жетелейді. Еліміздің атынан халықаралық алаңда сөз сөйлеп, Жетісу облысының атынан қатысу мен үшін үлкен мақтаныш, – деді ол.
Делиде Қазақстан жастары Үндістанның Сыртқы істер министрі Субраманиям Джайшанкармен кездесті. Форумның қорытынды кешінде Жастар ісі және спорт министрі Мансух Мандавия Орталық Азияның жүз жасын қабылдап, сый-сияпат жасады. Әр елдің көшбасшылары лауазымды тұлғалар алдында сөз сөйлеп, өз елдерінде жастар саясаты қалай жүргізілетінін айтты. Кеш соңында Орталық Азия жастары министрлер алдында өнер көрсетіп, өз елінің мәдениетін паш етті.
Форум қатысушылары әлемдік үздік оқу орындарының қатарына кіретін Үндістанның технология институтына ат басын бұрып, зертханасын аралап көрді. Жастар Делиге келген адам соқпай кетпейтін қасиетті жер – Бабыр баласы Хумаюн жерленген кесенеге де барды.
Делегация құрамына Орталық Азияның түрлі саладағы жас көшбасшылары кірді. Олар сапар барысында Үндістанның тарихымен, мәдениетімен, бизнес саласымен танысып, елдің бай мәдени мұрасына куә болды.
Медет ЖҰМАБАЙ
