Бейсен Құранбек атындағы Журналистер үйінде Жетісу облысында жастардың саяси белсенділігін арттыруға арналған «Жас саясаткер мектебі» жобасы таныстырылды. Бастаманы «Жетісу жастары ұйымының Конгресі» ЖҚБ және облыстың Қоғамдық даму басқармасы жүзеге асырады.
Жоба наурыздан маусымға дейін жалғасып, қатысушылар мемлекеттік басқару, заң шығару, жергілікті өзін-өзі басқару, саяси көшбасшылық және жобалық қызмет бойынша білім алады. Бағдарламада дәрістер мен семинарлардан бөлек практикалық сабақтар, тренингтер және шеберханалар қарастырылған. Әр айда кемінде екі оқу шарасы, ал облыстың әр ауданы мен қаласында төрт көшпелі іс-шара өткізіледі.
«Бұл жоба аясында тек қалалық жастар ғана емес, аудан және облыс жастары да қамтылады. Аудан жастары үшін көшпелі сабақтар ұйымдастырылып, арнайы семинарлар өткізіледі. Жақын аудандардан келіп қатысуға ниетті жастарға да мүмкіндік бар. Дегенмен негізгі аудитория – қаладағы оқу орындарының студенттері. Сабақтар офлайн форматта өтеді. Қатысушылар тәжірибе жинақтап, өзара байланыс орнатады. Бағдарлама барысында мемлекеттік қызмет пен саясат саласының қыр-сырын меңгеріп, түрлі спикерлерден тәлім алады. Теориямен қатар, практикалық бағытқа басымдық беріліп, жастар мемлекеттік мекемелердің жұмысымен танысады. Бұл олардың қоғамдық белсенділігін арттырып, кәсіби қабілеттерін жетілдіреді. Оқу соңында берілетін сертификаттың да қосымша пайдасы бар», – деді «Жетісу жастары ұйымының Конгресі» ЖҚБ төрағасы Дәулет Ауданбаев.
Жоба аясында ақпараттық-түсіндіру жұмыстары жүргізіліп, өңірлерде бастаманың мазмұны кеңінен таныстырылады. Бағдарлама тек колледж студенттерімен шектелмей, 18-35 жас аралығындағы жастарға арналған. Қатысушылар іріктеу талаптарына сәйкес таңдалып, белсенділік негізінде арнайы тізімге енеді. Аптасына бірнеше сараптамалық алаң өткізіліп, қатысушылар өз ұсыныстарын білдіреді, ал негізінде аналитикалық есептер әзірленеді. Жобаға психологтар, саясаттанушылар мен түрлі сала сарапшылары тартылып, қатысушылар жан-жақты бағаланады.
«Жобаның негізгі мақсаты – жастар белсенділігін арттыру және өңірдің дамуына үлес қосатын азаматтарды дайындау», – деді Жетісу облысының қоғамдық даму басқармасының жастар және отбасы саясаты бөлімінің басшысы Жанерке Бексеитова.
Қатысушылар конкурстық негізде таңдалып, бағдарлама соңында 30 адам сертификат алады, үздік 10 қатысушы 100 000 теңге сыйақымен марапатталады. Сонымен қатар, қатысушыларға жобаның символикасы бар имидждік өнімдер беріледі. Қорытынды кезеңде 200-ден астам қатысушы өз тәжірибесін таныстыратын кең көлемді сессия өткізіледі.
Аяулым ШЫНГАЕВА
