Жергілікті атқарушы органдар бөлетін мемлекеттік білім беру гранттарын тағайындау конкурсына қатысу үшін құжаттарды қабылдау процесі ресми түрде басталды, – деп хабарлайды 7-su.kz ақпараттық порталы.
Ұлттық білім беру жүйесінде жастардың жоғары білім алуына қолдау көрсету мақсатында жыл сайын жергілікті әкімдіктер арнайы қаржы бөледі. Бұл бастама өңірлердегі еңбек нарығында тапшы кадрлар мәселесін шешуге, әсіресе ауылдық жерлерді білікті мамандармен қамтамасыз етуге бағытталған.
2026-2027 оқу жылында жергілікті атқарушы органдар бакалавриат, магистратура және резидентура бағдарламалары бойынша білім алуға барлығы 2392 білім беру грантын ұсынып отыр. Бұл гранттар әр аймақтың өндірістік, әлеуметтік және экономикалық қажеттіліктеріне сәйкес басым бағыттар бойынша бөлінді.
Ең көп квота бөлген өңірлердің көшбасында Астана қаласы тұр. Елорда әкімдігі 303 грант бөлсе, Шымкент қаласы 285 грант ұсынды. Шығыс Қазақстан облысы да жастарды қолдауда белсенділік танытып, 270 грант бөлді. Өзге аймақтар бойынша көрсеткіштер төмендегідей:
-
Батыс Қазақстан облысы: 211 грант
-
Абай облысы мен Түркістан облысы: 200 гранттан
-
Ақмола облысы: 199 грант
-
Қарағанды облысы: 198 грант
-
Атырау облысы: 187 грант
-
Маңғыстау облысы: 163 грант
-
Қалған облыстар: 100-ге жуық гранттан
Талапкерлер арасында бәсекелестік негізінен 55-56 балдан жоғары нәтиже көрсеткендер арасында өтуі мүмкін. Алайда нақты өту балы таңдалған мамандық пен конкурсқа түскен өтініштердің санына байланысты анықталады.
Конкурсқа қатысу тәртібі мен құжаттар тізімі
Білім грантын жеңіп алу конкурсына қатысу үшін талапкерлер өздері таңдаған жоғары оқу орнының қабылдау комиссиясына тікелей өтініш білдіруі қажет. Өтінішпен бірге мынадай құжаттар жиынтығы тапсырылады:
-
Білім туралы құжат (аттестат немесе диплом);
-
Негізгі ҰБТ тапсырғанын растайтын сертификат;
-
Жеке басын куәландыратын құжаттың көшірмесі;
-
Жеңілдік санатын растайтын құжаттар (көпбалалы отбасылар, жетім балалар, т.б. арнайы санаттар үшін).
Құжаттарды қабылдау мерзімі мен конурс шарттары туралы толық ақпаратты жергілікті әкімдіктерден және университеттің қабылдау комиссиясынан білуге болады. Ғылым және жоғары білім министрлігі бөлген республикалық гранттан шегерілген немесе бал жинай алмай қалған жастар үшін бұл үлкен мүмкіндік. Жоғары оқу орындарына құжат қабылдау процесі 25 тамызға дейін жалғасады.
