«Таза Қазақстан» республикалық бағдарламасы шеңберінде «ECORace» Экологиялық акциясы жоғары деңгейде өтті, – деп хабарлайды 7-su.kz ақпараттық порталы.
Арнайы ұйымдастырылған бұл бастама қоршаған ортаны қорғау мәдениетін қалыптастыру, экологиялық жауапкершілікті арттыру, сондай-ақ тұрғындарды, әсіресе белсенді жастарды табиғатты аялауға, тазалықты сақтауға бағытталды. Ауқымды іс-шара қоғамда экологиялық сананы нығайтып, туған жер табиғатына жанашырлық көзқарас қалыптастыруды көздейді.
«ECORace» шарасы Балқаш көлінің жағалауында өтіп, тұрғындардың белсенді қатысуымен ерекшеленді. Бастапқы старт нүктесінде қатысушыларға экологиялық акцияның мақсаты мен маңыздылығы кеңінен түсіндірілді. Ұйымдастырушылар тарапынан әрбір азаматқа қолғаптар мен қоқыс жинауға арналған қаптар табысталды.
Қатысушылар белгіленген бағыт бойынша ұйымшылдықпен қозғалып, көл жағалауы мен автомобиль жолының бойындағы тұрмыстық қалдықтарды жинады. Топталған қоқыс финиш нүктесіне жеткізіліп, сұрыптауға тапсырылды. Нәтижесінде демалыс аймағы мен жағалау бойы айтарлықтай тазартылып, аймақтың экологиялық жағдайын жақсартуға нақты үлес қосылды.
Жетісу облысының ішкі саясат басқармасы мәлім еткендей, табиғатты қорғауға деген ортақ ұмтылыс, бірлік пен ынтымақтастық іс-шараның басты жетістігі атанды. Жастар туған жерге деген жанашырлығын іс жүзінде көрсетіп, экологиялық мәдениеттің маңыздылығын тағы бір мәрте дәлелдеді.
«Бұл шара қоршаған ортаны қорғау тек бір реттік акция емес, әрбір азаматтың күнделікті өмір салтына айналуы тиіс екенін айқындаған маңызды бастама. Жоба демалыс аймақтарын таза ұстауға, табиғатты құрметтеуге бағытталған. «ECORace» экологиялық шарасы «Таза Қазақстан» идеологиясын кеңінен дәріптеп, қоғамда экологиялық жауапкершілікті арттыруға елеулі үлес қосты», – деп атап өтті Жетісу облысы бойынша «Қазақстан студенттерінің альянсы» омбудсмені Қызайбай Ақерке Досымханқызы.
Экологиялық мәселелерді шешу тек мемлекеттік органдардың емес, бүкіл қоғамның ортақ міндеті. Балқаш сияқты бірегей табиғи нысандарды сақтау 50-60 жылдан кейінгі ұрпақ болашағы үшін де аса маңызды. Осындай іс-шаралар арқылы жастар арасында табиғатқа ұқыпты қарау әдеті қалыптасады.
