Жетісу облысында ерекше қажеттілігі бар балалардың заманауи технологияларды меңгеруіне мүмкіндік беретін жаңа білім беру жобасы іске қосылды. Талдықорғандағы «Future-IT» робототехника мектебінде балалар робототехника, бағдарламалау, 3D-модельдеу және лазерлік технологиялар бойынша білім ала бастады, – деп хабарлайды 7-su.kz ақпараттық порталы.
Жоба облыстық жұмыспен қамтуды үйлестіру және әлеуметтік бағдарламалар басқармасының қолдауымен мемлекеттік әлеуметтік тапсырыс аясында жүзеге асырылуда. Курсты «QRobotics foundation» қоғамдық қоры тегін ұйымдастырған.
Жоба аясында 5 пен 18 жас аралығындағы кемінде 25 баланы оқыту жоспарланған. Олардың қатарында есту, сөйлеу қабілеттері және тірек-қимыл аппараты бұзылған балалар бар. Оқу бағдарламасының жалпы ұзақтығы – 36 сағат, ал курстар шамамен 90 күнге есептелген.
Сабақтар балалардың жасына, жеке қажеттіліктеріне және материалды меңгеру қарқынына қарай бейімделеді. Кіші топтағы балаларға 24 сабақ, ал 9–18 жас аралығындағы қатысушыларға 12 сабақ өткізіледі. Әр бала 3D-принтер арқылы кемінде үш бұйым жасап, лазерлік кесу технологиясымен тағы бір бұйым әзірлейді.
Оқу барысында балаларға жеке сүйемелдеу көрсетіліп, тапсырмалар кезең-кезеңімен түсіндіріледі. Сабақтарды робототехника, бағдарламалау және цифрлық өндіріс салаларында тәжірибесі бар төрт маман жүргізеді.
«Future-IT» мектебінің директоры Дамир Нұркежановтың айтуынша, жобаның мақсаты – ерекше қажеттілігі бар балалардың цифрлық және инженерлік технологияларға қолжетімділігін арттырып, олардың қоғамға бейімделуіне және болашақ мамандығын таңдауға ертерек бағдар алуына жағдай жасау.
Курс соңында инклюзивті робототехника турнирін өткізу жоспарланған. Қатысушылар роботтар жарысы және уақытқа есептелетін тапсырмалар бойынша бақ сынайды. Барлық балаға сертификат, диплом және медаль табысталады.
