Жүрсін Ернұр 1-сынып оқушысы. Жасы алтыда. Үйдің екі қыздан кейінгі үшінші баласы. Өзінен кейін Билік есімді інісі бар. Жүрсін бауырларының арасындағы ең қағылезі. 5-6 рет қайталаған өлеңін лезде жаттап алып, судыратып оқып береді.
Өлеңді тез жаттайтын қабілетінің арқасында жыр додаларында үнемі жүлделі орындардан көрініп келеді. Балабақша табалдырығын аттағаннан-ақ жыр жұрнағын көкейіне ұялатқан Жүрсін бұл күні ата-анасы мен мұғалімдерінің мақтанышына айналған.
Ойын баласы ең алғаш өлеңді небәрі 4 жасында жаттапты. Ұстаздан Ыбырай Алтынсариннің «Өзен» атты жыр шумақтарын жаттап келуге тапсырма алған әпкесі ұзақ уақыт дайындалып, жыр жолдарын көкейіне толық қондыра алмайды. Сол шақта құлақ тұсында көп қайталана берген өлеңді 4-сыныпта оқитын әпкесінен бұрын Жүрсін жатқа оқып берген екен. Онысына отбасындағылар түгелдей таңғалған көрінеді.
Жүрсін қазіргі уақытта Абай Құнанбаев, Ілияс Жансүгіров, Мұқағали Мақатаев сынды ақындардың 20-ға жуық өлеңдерін жатқа оқиды. Жеткіншек есейгенде ақын болғысы келетінін айтады. Жай ғана ақын емес, Жүрсін Ерман сияқты айтыс тізгінін қолында ұстап, жұрттың ыстық ықыласына бөленіп жүргісі келетінін жасырмады.
Медет ЖҰМАБАЙ
