Облыс әкімі Бейбіт ИСАБАЕВ Бірікке Ұлттар Ұйымының Қазақстандағы Халықаралық көші-қон ұйымы миссиясының басшысы, Орта Азия бойынша координаторы Серхан Актопракпен кездесті. Басқосуда әріптестік байланыс, еңбек миграциясы, сұранысы жоғары жұмысшы мамандарды даярлау мәселелері талқыланды. Кездесуде Бейбіт Өксікбайұлы қонақтарға аймақтың тыныс-тіршілігін, атқарылып жатқан игі істерді баяндап, көші-қон мәселесі, еңбек миграциясын реттеу, жұмыс күші жетіспеушілігі мәселесін шешу бағытындағы жұмыстарға тоқталды.
– Жетісу – аграрлы аймақ. Облыста ауыл шаруашылығы, жаңартылған энергия көздері, өнеркәсіп салаларының әлеуеті зор болғандықтан білікті мамандар қажет. Осыған орай жоғары сұранысқа ие жұмысшы мамандарды даярлау ісін заман талабына сай жаңғыртып, жергілікті колледждермен бірлесіп қарқынды жұмыс атқара бастадық. Біз Талдықорған қаласында жұмысшы мамандарды тәжірибеден өткізетін орталық салуды жоспарлап отырмыз, – деді облыс әкімі.
Өз кезегінде Серхан Актопрак:
– Еңбек мигранты шетелде өз мамандығы бойынша жұмыс істеуі керек. Біз осы мәселені мықтап қолға алып жатырмыз. Білім алуға кеткен жастарға да барынша қолдау білдіреміз. Себебі, шетелде білім алған, тәжірибесі толысқан азамат елге білікті маман болып оралып, озық технологияларды, жақсы идеяларды да өзімен бірге ала келеді, – деді.
Жастардың техникалық мамандықтарға деген қызығушылығын арттыру үшін оларды жоғары оқу орындарына дейін STEM бағытында дайындайтын Хаб ашуды ұсынып, жұмысшы мамандарды тәжірибеден өткізудің маңызы зор екенін айтты. Осы орайда Талдықорғанда ашу жоспарланып отырған орталықты облыс әкімдігі мен Халықаралық ұйым бірлесіп жүзеге асыруға ниетті екенін жеткізді. Жаңа ашылатын орталық халықаралық іргелі жоба ретінде еліміздегі осы бағыттағы алғашқы пилоттық жоба болмақшы. Өзінің нәтижесін көрсеткеннен кейін бұл бастаманы басқа өңірлерге, тіпті өзге таяу шетелдерге де үлгі етіп көрсетуге болады. Кездесу соңында тараптар бастамаларды сараптамалық деңгейде талқылауға уағдаласып, бірлесіп жұмыс істеуге әзір екенін тілге тиек етті.
Айдар ҚАЛИЕВ
