ҚР Ұлттық экономика министрлігі Табиғи монополияларды реттеу комитетінің Жетісу облысы бойынша департаменті «Талдықорғанжылусервис» КМК-ның инвестициялық бағдарламасын орындау аясында жөнделіп жатқан жылумен жабдықтау нысандарымен танысу үшін баспасөз турын өткізді.
– «Талдықорғанжылусервис» құрамында жалпы қуаттылығы 457,95 Гкал/сағ. құрайтын 10 қазандық бар. Жұмыс істеп тұрған 10 қазандықтың ішінде соңғы 3 жылда 5 кварталдық қазандық газ отынына ауыстырылды – (№ 1, 2, 3, 4, 18). Қаржыландырудың тоқтатылуына байланысты № 4 кварталдық қазандығын мазутқа ауыстыру бойынша жұмыстар аяқталған жоқ және бу қазандығы сатып алынбады. 2023 жылдың 1 қыркүйегінен бастап қаржыландыру жалғасқаннан кейін жоғарыда аталған іс-шаралар бойынша жұмыстар жүзеге асатын болады», – деді жиын барысында «Талдықорғанжылусервис» мекемесінің бастығы Манархан Ахымбеков.
Аталған 5 қазандық биыл толығымен қайта құрылған, заманауи жабдыққа ауыстырылып, газбен жұмыс істейтін қазандықтардың технологиялық процестері толығымен автоматтандырылған. Кәсіпорын бойынша жабдықтың тозуы 82% — дан 72% — ға дейін төмендеген. Қосымша инвестиция салуды талап ететін «Басқуат» қазандығы (жабдықтың тозуы 72%), пайдалануға берілген жылы – 1981 ж. Қазіргі уақытта жергілікті бюджет қаражаты есебінен 2024 жылдан бастап «Басқуат» қазандығын газға кезең-кезеңімен ауыстыру бойынша ЖСҚ әзірленуде. «Басқуат» қазандығында жылу энергиясын өндіруді жалпы өндірістік қуаты сағатына 200 Гкал құрайтын 4 су жылыту қазандығы жүзеге асырады. Орнатылған 4 қазандықтың екеуін 2024 жылы газға ауыстыру жоспарлануда. 2023 жылы 3 су жылыту қазандықтары мен қазандық-қосалқы жабдықтарды күрделі жөндеу жоспарланған.
«Талдықорғанжылусервис» КМК қызмет көрсететін жылу желілерінің ұзындығы бір құбырлы өлшемде 179,3 шақырымды құрайды. Кәсіпорын жыл сайын инвестициялық бағдарлама қаражаты есебінен шамамен 6-7 шақырым құбырды жөндейді, осыған байланысты проблемалық, авариялық және тозған учаскелердің саны азаяды, бұл өз кезегінде желілердің тозу деңгейінің жыл сайын 1,0%-1,5%-ға төмендеуіне әкеледі. Бүгінгі таңда жылу желілерінің тозуы 62% құраған.
Жылумен жабдықтау объектілерінде күрделі жөндеу жүргізуге инвестициялардың ұлғаюының арқасында кәсіпорын тозу деңгейін жыл сайын 1,5% — ға дейін төмендетуге қол жеткізуді жоспарлап отыр, бұл технологиялық жабдықтың қызмет ету мерзімін ұзартуға және пайдалану, өндіріс тиімділігін жақсартуға, қосымша инвестициялар есебінен жабдықты жаңартуға мүмкіндік бермек.
Биыл кәсіпорынның жоспарланған жөндеу жұмыстарын жүзеге асыру үшін 262 миллион теңге бөлінген. Бұл қаражат жаңғыртуға, негізгі қорларын қалпына келтіруге, аварияларды болдырмауға бағытталған.
Медет ЖҰМАБАЙ
