Аутист балалар үкімет қамқорлығында. Ерекше балаларды бағып, қағып отырған аналар да әрқашан қоғамның назарында. Бүгін Талдықорғандағы Ушинский атындағы орта мектепте «Санасезім» қоғамдық қоры балаларға арнап шырша мерекесін ұйымдастырды.
Шыршаны қызықтап, суретке түсіп, өздеріне жасалған мерекеге шаттанған балалардың күлкісі әлемді мейірімді жандардың пейілі жайнатып тұратынын дәлелдегендей. Ата-аналар қонақ балаларды ертегі әлемінің кейіпкерлеріне сай киіндіріп әкеліпті. «Санасезім» қоғамдық қоры шараны барынша қызықты, тартымды, мәнді ұйымдастырған. Балалар көңілді әуенге елтіп, ерекше қуанып, Аяз атамен суретке түсіп шаттанды. Мектеп оқушылары ерекше балаларға концерттік бағдарлама дайындапты. Биші қыздармен қосылып қонақ балалар да ән айтып, әсем әннің ырғағында биледі. Шараға келген ата-аналардың да жүзі бал-бұл жанды. Олар балаларының көппен бірге қуанып, шыршаны қызықтап, қоғамның бел ортасында жүргеніне шаттанды. Ұйымдастырушыларға алғыс білдіріп жатты. Күләш апа: «Мерекеге немеремді алып келдім. Қараңызшы, асыр салып ойнап жүр. Кейде қуанғаннан кілемге жата қалып аунап алады. Шыршаны айналып жүгіреді. Тәтелеріне еркелеп қояды. Мен де демалып қалдым. Бақыттыгүл қызыма алғыс айтамын», – деді ол ағынан жарылып.
Шара барысында қоғамдық қор директоры Бақыттыгүл Ахметжанова балаларға сыйлық таратты. «Қуантсаң, баланы қуант»,– деген емес пе?! Ұл-қыздар өздерінің аттары аталғанға мәз болып, жүгіріп барып сыйлықтарын алып жатты.
Мұндай шараны жиі өткізіп тұратын қоғамдық қор өкілдері ерекше баланы бағып отырған аналарға да көңіл бөліп, мәселелерін шешуге жәрдемдеседі. Әйелдер мерекесінде балалардың аналарына да құрмет көрсетіп, сыйлық таратады. Керек кезде психологиялық көмек ұсынады.
Бүгінгі шырша мерекесіне 55 ерекше бала қатысты. Олардың әрқайсысы қордың атынан тәттілер, ойыншықтар алды. Бұл күні Талдықорған қаласының әкімі Ернат Бәзілдің атынан ұйымдастырушыларға әлеуметтік мәселелерге атсалысып жүргені үшін Алғыс хат табыс етілді.
Г. Мұқашқызы
Суретті түсірген Жұмабай Мұсабеков
