Жаңа жыл қарсаңында Алакөл ауданында халықтың әлеуметтік осал топтары және көпбалалы ана санатындағы 70 отбасы баспаналы болды. Атап айтсақ, Үшарал қаласында 41, Қабанбай ауылында 15, Бескөл ауылында 10 және Қазақстан ауылында 4 жеке тұрғын үйдің кілті тапсырылды.
Қуанышқа жиналған қауым алдында жүрекжарды тілегін білдірген аудан әкімі тұрғын үймен қамтамасыз ету – халықтың өмір сүру сапасын көтерудегі ең басты мәселенің бірі екенін айтты. Шара барысында ақжаулықты әжелер шашу шашып, ақсақалдар ақ батасын беріп, жылы лебізін білдірді. Көптен күткен үйді иеленген жандардың қуанышында шек жоқ. Қонысқа ие болған жақындарын құттықтап, шашу шашып, тілек айтушылар қатары да аз болмады.
Пәтер кілтін алғандардың бірі көпбалалы ана Айжан Жақашбаева:
– Тұрғын үй кезегінде тұрғаныма 8 жылдан астам уақыт болды. 6 баламмен сапасы нашарлау жалдамалы үйлерде тұрып келдік. Міне, бүгін тұрғын үй кезегімен өзіміздің жеке жаңа, заманауи тұрғын үйдің кілтін иеленіп жатырмыз. Қуанышымызда шек жоқ. Барша жаңа қоныс иелерін құттықтаймын. Мұндай жақсылықтың шарапатын қиналып жүрген әрбір отбасы көрсе деп тілеймін. Қол ұшын созып, көмектескен жандарға алғысымды білдіремін, – деді.
Аудан бойынша тұрғын үй кезегінде 4 санат бойынша 1659 азамат тіркелген. Халықтың әлеуметтік ахуалын жақсарту, тұрғын үймен қамтамасыз ету мақсатында Үшарал қаласы, Қабанбай, Қазақстан, Бескөл ауылдарында 60 жалға берілетін жеке тұрғын үй сатып алынса, облыстық бюджет қаражатына Қабанбай ауылында 10 жалға берілетін жеке тұрғын үй салынды. Тұрғын үй құрылысын мердігер «Enif stroy» ЖШС жүргізіпті.
Жыл басынан бері Үшарал қаласында 60 пәтерлі көпқабатты тұрғын үй қолданысқа беріліп, 60 отбасы баспаналы болды. Келер жылы отбасыларды тұрғын үймен қолдаудың кешенді үлгісі жалғасады.
Айжан МҰРАТОВА
Алакөл ауданы
