Жаңа медициналық пункттің құрылысы облыстық құрылыс басқармасының тапсырысымен жүзеге асырылған. Жобаның жалпы құны 190 миллион теңгеден асады. Құрылыс жұмыстарын «Жаркент алғыр» жауапкершілігі шектеулі серіктестігі атқарды. Нысанның құрылысы өткен жылдың 5 қыркүйегінде басталып, бүгінде дайындық деңгейі 95 пайызға жеткен.
ФАП іске қосылғаннан кейін ауыл тұрғындары алғашқы медициналық-санитариялық көмек, амбулаториялық қызмет, жедел және шұғыл медициналық көмек, профилактикалық тексерулер мен екпе алу мүмкіндігіне ие болады. Сонымен қатар, тұрғындарға саламатты өмір салтын ұстануға бағытталған кеңестер де беріледі. Медициналық пункт 738 адамға қызмет көрсетуге бейімделген. Оның ішінде 197 бала, 39 жасөспірім және 502 ересек бар.
Салтанатты жиынға қатысқан Ескелді ауданының әкімі Елдос Ахметов ауылдық денсаулық сақтау саласына көрсетіліп жатқан қолдауға тоқталды.
– Халықтың амандығы – мемлекеттің басты байлығы. Сондықтан медицина саласын дамытуға ерекше мән беріп отырмыз. Ауылдық денсаулық сақтауды жаңғырту жобасы аясында аудандағы 5 елді мекенде жаңа нысандар бой көтеріп, жеті мыңнан астам тұрғын сапалы медициналық қызметпен қамтылуда, – деді аудан басшысы.
Жиында аудандық орталық аурухананың бас дәрігері Сәуле Құсмолданова ауыл тұрғындарын жаңа нысанның ашылуымен құттықтады.
Ал ауыл тұрғыны Сағи Жүнісов елге көрсетілген қамқорлыққа ризашылық білдірді.
– Бұл біз үшін үлкен қуаныш. Ауыл адамдары шын мәнінде риза. Осындай игі істер көбейе берсін, – деді ол.
Санжар СҰЛТАНҒАЗЫ
